Халаантан эмсэҕэлээбиттэргэ төлөбүр харчыта үрдүөҕэ

Айсен Николаев бүгүн, от ыйын 28 күнүгэр, бырабыыталыстыба мунньаҕар ардах уутун халааныгар эмсэҕэлээбиттэргэ, ууга барбыт дьиэлээхтэргэ биир кэмнээх төлөбүр сууматын үрдэтии боппуруоһун түргэнник быһаарарга сорудахтаата.

Бу быһаарыыны кини Өймөкөөн улууһугар сылдьан кэлэн баран, ылынна. Төлөбүр кээмэйэ 100 тыһыынчаттан 200 тыһыынчаҕа диэри үрдүөҕэ.

«Бастакы өйөбүл миэрэлэрэ олоххо киирэн эрэллэр, ол гынан баран, бары көмө түргэнник уонна сыаллаах-соруктаах ылыллара улахан суолталаах», — диэн Айсен Николаев бэлиэтээтэ.

Өймөкөөн нэһилиэгэр Сунтаар, Ньурба уонна Горнай улуустарын тутар биригээдэлэрэ үлэлэрин саҕалаабыттарын тоһоҕолоон эттэ, өрөспүүбүлүкэ олохтоохторугар махталын биллэрдэ.

«Көмө ыҥырыытыгар хас да улуус тута хоруйдаабыта олус наадалаах. Биригээдэлэр чөлүгэр түһэрии үлэтин саҕалаатылар. Туора турбатах дьоҥҥо барыларыгар махтанабын. Саха сирин олохтоохторо сомоҕолоһуу уонна бэйэ-бэйэҕэ көмөлөһүү күүһүн өссө төгүл көрдөрдүлэр», — диэтэ өрөспүүбүлүкэ баһылыга. Ил Дархан эмсэҕэлээбит сирдэргэ миниистирдэри солбуйааччылары ыытар быһаарыыны сөптөөҕүнэн ааттаата.

«Кинилэр көдьүүстээхтик, миэстэтигэр көмөлөһөн үлэлээтилэр. Билиҥҥи түһүмэххэ сүрүн соругунан чөлүгэр түһэрии үлэтин тэрийии буолар. Былааннар үөскээтилэр, матырыйааллар кэлэн эрэллэр, исписэлиистэр соруктары толорор буоллулар», — диэн Айсен Николаев бэлиэтээтэ.

Кини ууга барбыт сирдэргэ киириини хааччыйбыт суол сулууспаларыгар ураты махталын биллэрдэ. Кыһыл көмүһү хостуур хампаанньалар чөлүгэр түһэриигэ эрдэттэн кыттыспыттарын, кинилэр көмөлөрө саамай сытыы боппуруостары түргэнник быһаарарга кыах биэрэрин бэлиэтээтэ.

Ититии боппуруостара туспа дьүүллэһилиннилэр. Хас да нэһилиэнньэлээх пууннарга икки килэмиэтир кэриҥэ ититэр ситимнэр өрөмүөннэниэхтэрин наада. Ититэр систиэмэлэри толору бэрэбиэркэлииргэ уонна элбэх кыбартыыралаах дьиэлэри ититиигэ холбуур туһунан сайабылыанньалары чопчу көрөргө дьаһал бэриллибитэ.

Мунньахха федеральнай сокуоҥҥа уларытыылары эмиэ көрдүлэр. Профессиональнай уонна орто идэҕэ үөрэхтээһин бырагыраамаларын чэрчитинэн, каадыры сыаллаах-соруктаах салааҕа бэлэмнээһин туһунан сокуон ылылынна. Бырабыыталыстыбаҕа маны былаанныырга учуоттуурга сорудах бэриллибит, тустаах управлениеларга Арассыыйа үөрэҕин министиэристибэтин кытта үлэлэһэргэ сорудах бэриллибит.