Халабырдьыттары уонна массыынаны күрэтээччилэри туттулар

Дьокуускай куоракка өрөбүл күн үүнэр түүнүгэр Строителлэр уулуссаларыгар эдэр киһини халаабыттар. Бу туһунан ИДьМ пресс-сулууспата иһитиннэрдэ.

Эдэр киһиэхэ үс киһи саба түһэн күүстэринэн сыаналаах мобильнай төлөпүөнүн  былдьаабыттар.  Полиция туһааннаах уорганнарынан «ориентировка» ыыталаабыт. Онон, халабырга уорбаланааччылары ол түүн Госавтоиниспиэксийэ ДПС батальонун үлэһиттэрэ туппуттар.  Ол курдук 18-тан 23-гэр диэри саастаах ханна да үлэлээбэт эр дьон эбит.  22 саастаах  Капитоновка олохтооҕо урут сууттана сылдьыбыта биллибит.

Аны бэҕэһээ госавтоиниспиэктэрдэр массыынаны күрэтэн барыыга уорбаланааччылары туттулар.

Тимирязев уулуссаҕа олорор киһи парковкаҕа «Probox» массыынатын булбатах. Онон тута уорганнарга тыллаабытын кэннэ,  «Перехват» былаан биллэриллибит.  35 уонна  41 саастаах хара санаалаах түөкүттэр тутуллубуттар. Массыына туруга этэҥҥэ.  Билигин бэрэбиэркэ ыытыллар.

Билигин  туһааннаах быһылааннарынан холуобунай дьыаланы көбүтүү туһунан боппуруоһу быһааралларын туһунан ИДьМ пресс-сулууспата иһитиннэрдэ.