«Халыма» айан суолугар массыына түҥнэстэн уматык тоҕунна

Олунньу 16 күнүгэр Томпо оройуонугар «Халыма» федеральнай суолун 321-с килэмиэтиригэр «Sitrak» мааркалаах ньиэп бородууктатын таһар цистерналаах массыына түҥнэстэн суол быһылаана таҕыста. Массыына түҥнэстэн, айан суолугар уматык тоҕунна.

СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтин уонна Госавтоиниспиэксийэ үлэһиттэрэ тута быһылаан буолбут сиригэр тиийбиттэр. Бэҕэһээ министиэристибэ бэрэбиэркэни ыытарын уонна экологияҕа хоромньу тахсыытын тохтоторго тустаах миэрэлэри ыларын туһунан иһитиннэрбитэ.

Томпо оройуонун борокуратуурата тохтубут ньиэби (төһө тохтубутун), суол-тырааныспар саахала тахсыбыт балаһыанньатын уонна буруйдаах дьону сокуон ирдэбилинэн эппиэтинэскэ тардыыны хонтуруолга ылла.