Халыма өрүскэ биир ый иһигэр иккис киһи ууга түспүтэ билиннэ

Сэтинньи 17 күнүгэр 1958 сыллаах төрүөх эр киһи сүппүтүн туһунан сайабылыанньа киирбит. Кэлин биллибитинэн, сүппүт киһи өссө алтынньы 4 күнүгэр Орто Халыма куораттан мотуордаах оҥочонон балыктыы барбыт эбит.

Сайабылыанньаны кэргэнэ болдьоммут кэмигэр төннүбэтэҕин кэннэ киллэрбит. Кини өрүс мууһа турбутун кэннэ дьиэтигэр снегоходунан кэлиэхтээх эбит. Сэтинньи 18 күнүгэр икки полиция үлэһитэ көрдүү барбыт. Полиция үлэһиттэрэ булчут үүтээнин көрбүттэр, охсуһуу эбэтэр арыгылааһын сибикитэ көстүбэтэх. Сотору кэминэн булчут дьиэтиттэн 1 км ыраах сиргэ өрүскэ снегоход суола көстүбүт, ол суола ойбоҥҥо тиийэн быстыбыт. Онно «Буран» снегоходунан ууга түспүт киһини булбуттар, бу туһунан Саха сиринээҕи Быыһыыр сулууспата иһитиннэрэр.

Санатан эттэххэ, Халыма өрүскэ биир ый иһигэр киһи ууга түспүтүн иккис түбэлтэтэ буолар. Билигин Орто Халыматааҕы быыһыыр-көрдүүр этэрээт быыһааччылара Үөһээ Халыма улууһугар ууга түспүт киһини көрдүүллэр. Икки суукка иһигэр уу аннынааҕы камералар көмөлөрүнэн өрүс 1,5 км-тэн тахса уһуннаах учаастага чинчийиллибит, билиҥҥитэ түмүгэ суох.