Халыма-Индигиир биир мандааттаах быыбардыыр уокуругар эбии куоластааһыҥҥа бүлүтүөннэр оҥоһулуннулар

Быйылгы Биир кэлим быыбар күнэ буолара ыйтан эрэ ордук хаалла. Быыбарга бэлэмнэнии үлэтэ тиһиктээхтик барар.

34 №-дээх Халыма-Индигиир биир мандааттаах быыбардыыр уокуругар Ил Түмэҥҥэ норуот дьокутаатын эбии быыбарыгар куоластааһыҥҥа бүлүтүөннэр оҥоһулуннулар диэн СӨ Киин быыбардыыр хамыыһыйата иһитиннэрэр.

Олохтоммут ирдэбиллэргэ сөп түбэһиннэрэн, Абый, Үөһээ Халыма, Муома, Өймөкөөн уонна Орто Халыма территориятааҕы быыбардыыр хамыыһыйаларын икки ардыларыгар 20 585 бүлүтүөн тарҕаныаҕа.

Санатан эттэххэ, 2024 сыл атырдьах ыйын 18 күнүттэн суола-ииһэ суох уонна кый ыраах сытар сирдэргэ 34 №-дээх Халыма-Индигиир биир мандааттаах быыбардыыр уокуругар Ил Түмэҥҥэ норуот  дьокутаатын эбии быыбарыгар болдьох иннинэ куоластааһын саҕаланыаҕа.