«Халыма» суолга саахалга үс киһи өлбүтүнэн бэрэбиэркэ саҕаланна

Ахсынньы 19 күнүгэр сарсыарда Аллараа Бэстээх уонна Төҥүлү икки ардынааҕы суолга дьон өлүүлээх суол быһылаана тахсыбыт. Быһылаан туһунан иһитиннэрии дьуһуурунай чааска сарсыарда 10:30 чаас саҕана киирбит.

Билигин биллэринэн, «Халыма» федеральнай суол 47-с км Төҥүлү сэлиэнньэтин диэки айаннаан испит «Toyota Esquire» массыына биир хайысханан иннигэр айаннаан иһэр «Sitrak C7H» таһаҕас тиэйэр массыына сыарҕатыгар кэтиллибит. Кыра массыына уруулугар 1989 с.т. суоппар, оттон салонугар үс пассажир олорбут. Саахал түмүгэр быһылаан тахсыбыт сиригэр омук массыынатын суоппара уонна кини икки пассажира — 1970 с.т. эр киһи уонна 1959 с.т. дьахтар тыыннара быстыбыт. Өссө биир пассажир, 1976 с.т. дьахтар, Мэҥэ Хаҥалас улууһун киин балыыһатыгар киллэриллибит. Саахал буолар кэмигэр дьахтар массыына кэннигэр курун баанан олорбут. Улахан массыынаҕа ким да эчэйбэтэх.

Саахал аспаал бүрүөһүннээх көнө суолга, тумантан сылтаан, мөлтөх күн-дьыл усулуобуйатыгар тахсыбыт. Быһылаан буолбут сиригэр Мэҥэ Хаҥалас улууһун борокуруора, силиэстийэлиир-суһал бөлөх уонна ГАИ үлэһиттэрэ үлэлээбиттэр. Быһылаан төрүөтэ чуолкайданар.

ГАИ сулууспата суоппардары тумаҥҥа, хаар түһэригэр уонна силлиэ-буурҕа кэмигэр суолга ордук болҕомтолоох буолалларыгар, суол быраабылаларын кытаанахтык тутуһалларыгар, куттала суох дистанцияны тутуһалларыгар уонна куттал үөскээтэҕинэ кэмигэр тохтуур кыахтаах  түргэнинэн айанныылларыгар ыҥырар, диэн ГАИ пресс-сулууспата суруйар.