«Халыма» суолун 26-с км массыына саахалыгар аҕам саастаах кырдьаҕас эчэйдэ

2025 сыл ахсынньы 13 күнүгэр 13 чаас 30 мүнүүтэ ааһыыта Арассыыйа ИДьМ Мэҥэ Хаҥалас улууһунааҕы отделын дьуһуурунай чааһыгар «Халыма» федеральнай айан суолун 26-с км массыына суолтан түспүтүн туһунан иһитиннэрии киирбит. Бу туһунан Мэҥэ Хаҥалас оройуонун Госавтоиниспиэксийэтэ иһитиннэрэр.

Бэрэбиэркэ кэмигэр быһаарыллыбытынан, 1977 сыллаах төрүөх киһи CHERY TIGGO7 массыынанан Дьокуускайтан Төхтүр сэлиэнньэтин диэки баран иһэн, «Халыма» федеральнай айан суолун 26-с км уруулун кыайан туппакка суол уҥа өттүгэр түспүт. Суол-иис быһылаанын түмүгэр 1935 сыллаах төрүөх олорсмон испит киһи эт-хаан араас эчэйиитин ылан Мэҥэ Хаҥалас оройоуннааҕы киин балыыһатыгар киирбит. Бу суол-тырааныспар быһылаанынан бэрэбиэркэ ыытыллар.

Госавтоиниспиэксийэ массыына суоппардарыгар, бастатан туран, суол туругун эрэ буолбакка, күн-дьыл хайдаҕын эмиэ учуоттаан, сэрэнэн айанныырга ыҥырар. Суоппардар уонна олорсон иһэр дьон куттал суох буолуутун курун кэтиэхтээхтэр. Ыраах сиргэ айанныыр кэмҥэ суоппардар үлэ уонна сынньалаҥ эрэсиимин тутуһуохтаахтар.