«Халыма» трассаҕа цистернаҕа уматыктаах массыына түҥнэстибит

Өймөкөөн улууһун Уус Ньара бөһүөлэгиттэн икки км тэйиччи сиргэ цистернаҕа дизельнэй уматыктаах массыына түнэстибит.

Уматык кыратык тохтубут, диэн атырдьах ыйын 11 күнүгэр СӨ Экологияҕа министиэристибэтигэр иһитиннэрдилэр. Быһылаан атырдьах ыйын 8 күнүгэр «Халыма» федеральнай суол 972-с км тахсыбыт.

Быһылаан тахсыбыт сирин Экология министиэристибэтин үлэһиттэрэ кэлэн көрбүттэр. Цистерна массыына суоппара саахал тахсар кэмигэр итирик туруктаах сылдьыбыта быһаарылынна. Кини дизельнэй уматыгы Магадан диэки тиэйэн испит.

«Эконадзор иниспиэктэрдэр быһылаан буолбут сирин көрөр кэмнэригэр суоппар массыынаҕа баар эбит. Массыына уҥа өттүнэн охтон сытара. Цистернаҕа, ону таһынан люктар хаппахтарыгар  алдьаныы көстүбэтэ», — диэн биэдэмистибэ иһитиннэриитигэр суруллар.