«Халыма» трассаны улахан уйуктаах массыыналар сырыыларын кэннэ чөлүгэр түһэрэллэр

«Халыма» айан-сырыы суолун 203-с км учаастагын чөлүгэр түһэрии уонна бөҕөргөтүү үлэлэрэ ыытыллаллар. Ол туһунан «Бүлүү» суол управлениетын пресс-сулууспата иһитиннэрэр.

Үлэлэр улахан уйуктаах таһаҕаһы тиэйэр тырааныспардар быраабылалары кэһиилэриттэн сибээстээн ыытыллаллар.

Ыам ыйын 26 күнүттэн трассаҕа, Чурапчыга уонна Ытык Күөлгэ, тырааныспары ыйааһынныыр икки көһө сылдьар пууна тэриллэн үлэлиир. Ол эрээри, быраабылалары кэһиилэр тахсыбыттара бэлиэтэммиттэр.

Ространснадзор үлэһиттэрин ирдэбиллэрин улахан уйуктаах тырааныспардар суоппардара тутуспатахтар. Чуолаан, ыам ыйын 28 уонна 29 күннэригэр Ытык Күөлгэ баар пууну 6 автосамосвал, оттон түүн бэс ыйын 1 уонна 2 күннэригэр өссө 11 тырааныспар тохтообоккэ эрэ ааспыттар. Онон Ытык Күөл уонна Чурапчы икки ардыларыгар суол алдьаммыт. Ону тэҥэ 199-200 км суол учаастагар улахан таһаҕаһы тиэйэр тырааныспардар суолга айан-сырыыга харгыстары үөскэппиттэр. Бу туһунан СӨ Тыраанспарга уонна суол хаһаайыстыбатыгар министиэристибэтэ иһитиннэрэр.