Халымаҕа ааспыт нэдиэлэҕэ сүппүт балыксыты көрдүүллэр

Үөһээ Халыма улууһугар Халыма өрүскэ ааспыт нэдиэлэҕэ сүппүт балыксыты көрдүүллэр. Сэтинньи 17 күнүгэр Орто Халыма куораттан быыһааччылар кэллилэр. Кинилэр өрүс аннын чинчийиэхтэрэ диэн СӨ Быыһыыр сулууспатын пресс-сулууспата иһитиннэрэр.

«Ол сиргэ Халыма өрүс кэтитэ 150 миэтэрэҕэ тиийэр, муус аннынан кыдьымах уста сытар, 800-1000 миэтэрэ усталаах тааҥнаах. Сүүсчэ лууҥканы тэһэллэрэ буолуо, уу аннын камеранан көрүөхтэрэ», — диэн иһитиннэриигэ суруллар.

Халыма өрүскэ киһи сүппүтүн туһунан иһитиннэрии сэтинньи 11 күнүгэр киирбит. Эр киһи Зырянка бөһүөлэгиттэн 80 км тэйиччи сиргэ балыктыы барбыт. Аймахтара кини снегоходун суолунан батыһан тиийэн тааҥҥа түбэспиттэр.

Үөһээ Халыма оройуонугар быыһыыр-көрдүүр этэрээт суох буолан, быыһааччылар Орто Халыма куораттан туруммуттар. Түөрт быыһааччы түөрт снегоходунан сэтинньи 15 күнүгэр турунан, сэтинньи 17 күнүгэр күнүс кэлбиттэр.