Халымаҕа уу таһыма үрдээтэ

Бүгүн, ыам ыйын 20 күнүгэр, Халыма өрүскэ уу таһыма үрдээбит — 1146 см тэҥнэспит. Кутталлаах таһым — 1200 см.

Бу туһунан Өлүөнэ тардыытынааҕы уу салалтатын уу хаһаайыстыбатын отделын начаалынньыга Варвара Максимова иһитиннэрдэ.  Кини этэринэн, гидропост аннынан муус хаайтарбыт. Муус турар түгэнигэр уу таһыма 1220-1270 см диэри үрдүүр кутталлаах.

Ленскэй  уонна Нам оройуоннарыгар уу таһымын түһүүтэ бэлиэтэнэр.  Алдан өрүскэ Уус Миил — Батамай учаастагар уу таһыма 30 см үрдээбитинэн турар. Амма өрүскэ Харбалаах сэлиэнньэтин таһыгар уу таһыма үрдүүр.

Яна өрүскэ, Дьааҥы — Сайдыы учаастакка муус хамсаан эрэрэ бэлиэтэнэр.