Хамаанданан түмүк билиннэ

Үс күн устата барбыт В.П.Ларионов аатынан өрөспүүбүлүкэтээҕи “Инникигэ хардыы” 30-c төгүлүн ыытыллар кэмпириэнсийэ-күөн күрэс түмүктэннэ. Хамаанданан кимнээх кыайдылар?

Улуустарынан хамаанда түмүгүн таһаарыыга орто дэлэгээссийэлэр кэккэлэригэр кыайыылааҕынан Кэбээйи улууһа аттанна. Улуустааҕы үөрэх управлениетын начаалынньыга Ирина Неустроева: “Кэбээйи улууһуттан быйылгы “Инникигэ хардыы” кэмпириэнсийэ-күөн күрэскэ 32 оҕо кыттыбытыттан иккис түһүмэххэ 23 оҕо ааста. Түмүккэ элбэх оҕо бириистээх миэстэҕэ тигистэ. Кинилэртэн Сангаардааҕы гимназияны, Кэбээйи, Ньидьили, Тыайа, Сэбээн Күөл оскуолаларын бэлиэтиэм этэ, кинилэр үрдүк түмүгү көрдөрдүлэр. Үөрэнээччилэр инженерияттан саҕалаан тыл тиэмэтигэр тиийэ үөрэтэллэр. Быйыл тиэхиньиичэскэй, оҥоһуу өй хайысхаларыгар дакылаат элбэҕэ үөрдэр.

2026 сылга Кэбээйи улууһугар “Олоҥхо” ыһыаҕа ыытыллыахтаах. Онон тустаах тиэмэ суолтата олус улаатта. Оҕолор, учууталлар фольклор тиэмэтин үөрэтиигэ  улахан болҕомтону уурдулар.

“Инникигэ хардыы” кэмпириэнсийэ баар буолан отут сыл устата оҕолорбут билимҥэ ситиһиилэринэн кынаттанан кэллибит. Кэбээйи улууһа 2021 сыллаахха бэйэтин бөлөҕөр үһүс миэстэни ылбыта. Онтон бүгүн, Кэбээйи улууһун үөрэҕин систиэмэтэ төрүттэммитэ 100 сылыгар оҕолорбут, учууталларбыт, билимҥэ салайааччыларбыт, төрөппүттэрбит улахан бэлэҕи оҥордулар. Улахан хамаандабытыгар, улууспут салалтатыгар, Нь.А.Соколова салайааччылаах үөрэх уонна билим министиэристибэтигэр, биология билимин дуоктарыгар М.М.Черосовка, Билим Дьоҕус академиятын кэлэктиибигэр  махталбын биллэрэбин», – диэн санаатын үллэстэр.

Хамаанданан кыайыылаахтар

Улуустар:

Кыра дэлэгээссийэ:

1 м. – Мииринэй оройуона

2 м. – Эбээн Бытантай улууһа

3 м. – Анаабыр улууһа

Орто дэлэгээссийэ:

1 м. – Кэбээйи улууһа

2 м. – Дьааҥы улууһа

3 м. – Эдьигээн улууһа

Улахан дэлэгээссийэ:

1 м. – Чурапчы улууһа

2 м. – Нерюнгри оройуона

3 м. – Мэҥэ Хаҥалас улууһа

Үрдүк таһымнаах оскуолалар:

1 м. – Мииринэй оройуонун политиэхиньиичэскэй лиссиэйэ

2 м. – Нерюнгри оройуонун 24-с нүөмэрдээх лиссиэйэ

3 м. – Уус Алдан улууһун Лөгөй лиссиэй– интэринээтэ

Эбии үөрэхтээһин тэрилтэлэрэ:

1 м. – Мииринэй оройуонун эбии үөрэхтээһиҥҥэ тэрилтэтэ

2 м. – Эбээн Бытантай улууһунааҕы оҕо киинэ

3 м. – Нерюнгритааҕы оҕону сайыннарар айар киин

Үүнүү точката:

1 м. – Уус Алдан улууһун И.Н.Жирков аатынан Дүпсүн орто оскуолата

2 м. – Чурапчы улууһун И.М.Павлов аатынан Чурапчы орто оскуолата

3 м. – Нам улууһун М.Е.Охлопкова аатынан Түбэ орто оскуолата.