Хамаҕатта нэһилиэгэр «Ыччат ыллыга» аһылынна

Бэҕэһээ, алтынньы 1 күнүгэр, Нам улууһун Хамаҕатта нэһилиэгэр «Ыччат ыллыга» сынньанар зона үөрүүлээх аһыллыыта буолла.

Дойду баһылыга Владимир Путин көҕүлээбит «Олорор дьиэ уонна куорат эйгэтэ» национальнай бырайыак «Куорат тупсаҕай эйгэтин тэрийии» федеральнай бырайыагынан улууспутугар Намҥа М.К. Аммосов аатынан Набережнай, Аппааныга «Мавра күөлэ» сынньанар сирдэр, Бастакы Хомустаахха, Үөдэйгэ уонна Модукка дьоҕус пааркалар оҥоһуллубуттара. Бу бырайыак олоххо киирэн нэһилиэнньэ сынньанарыгар, культурнай-маассабай тэрээһин ыытылларыгар бары өттүнэн табыгастаах эйгэ тэрилиннэ.

Үөрүүлээх тэрээһиҥҥэ аалай лиэнтэни улуус баһылыга Юрий Слепцов, СӨ Ил Дарханын архитектураҕа уонна куораты тутууга управлениетын салайар Любовь Папок, Хамаҕатта нэһилиэгин баһылыга Евгений Ушницкай уонна Е.М. Шапошников аатынан Хамаҕатта орто оскуолатын учуутала Айыына Гоголева быстылар. Ол кэннэ олохтоохтору кытта уоттаах-күөстээх остуолба аннынан тыргыллыбыт тротуарынан киин сыанаҕа хааман кэллилэр.

Бу үлэни олохтоох урбаанньыт Семен Кривогорницын уонна Григорий Кобяков генеральнай директордаах «Лигран» ХЭТ оҥорон олоххо киллэрдилэр. Хамаҕатта киинигэр уоттаах-күөстээх оҕо-ыччат сынньанар, оонньуур анал сирдэрдээх зона тутуллан нэһилиэк сэргэхсийдэ. Үлэ бырайыагын улуустааҕы архитектура уонна куораты тутуу салаатын начальнигынан, улуус кылаабынай архитекторынан үлэлээбит Анна-Мария Степанова оҥорбута.

Мустубут дьону улуус баһылыга Юрий Слепцов, Хамаҕатта нэһилиэгин баһылыга Евгений Ушницкай, СӨ Ил Дарханын архитектураҕа уонна куораты тутууга управлениетын салайар Любовь Папок, ыччат аатыттан Айыына Гоголева эҕэрдэ тыл эттилэр.

«Ыччат ыллыга» сынньанар сиргэ инникитин нэһилиэк ыытыллар тэрээһиннэрэ, тыа хаһаайыстыбатын дьаарбаҥкалара, норуот күүлэйэ барыта манна ыытыллар буолуоҕа. Онон, Хамаҕатта нэһилиэгин олохтоохторугар истиҥ эҕэрдэбитин тиэрдэбит. Саҥа тутуугутун көрө-истэ, харыстыы сылдьыҥ.

Нам улууһун дьаһалтатын пресс-сулууспата