Хамаҕаттаҕа — Дьахтар сайынын дьэдьэннээх мичээрэ

Бу күннэргэ норуот синоптига Тускул билгэтэ бигэргэтиллэн, «Дьахтар сайына» дэнэр  ичигэс, сырдык чаҕылхай күннээх көмүс күһүн үтүөкэннээх кэмэ кэлэ турар.

Дьэ, бу маннык кэмҥэ түбэһиннэрэн, тыа сирин дьахтарын биир күнүн туһунан Хамҕаттатааҕы «Тупсууна» дьахтар сэбиэтин бэрэссэдээтэлин солбуйааччы Мария Аманатова-Сандаара Баат маннык кэпсээтэ:

— Норуот синоптигынан биллэр Тускул «Дьахтар сайына» баар, сотору кэлиэ» диэн сөпкө да эппит эбит  —  бу үтүөкэннээх кэмҥэ түбэһиннэрэн, мин бүтэһик дьэдьэммин хомуйдум.

Баҕар, эбии  ичигэс күн-дьыл турдаҕына, өссө биирдэ хомуйуом.

Мин кыстыыр дьэдьэни олордубутум аҕыс сыл буолла. Дьон  бэйэтэ кэлэн хомуйар буолбута үһүс сыла.

Дьоҥҥо сайыҥҥы минньигэс амтаннаах, дыргыйар  сыттаах дьэдьэни бэйэлэригэр хомуйтарар туспа үөрүү. Ити кэмҥэ ураты дьикти ахтылҕан саҕыллар:  оҕо сааһы санаһыы, эдэр сааһы эргитии. Дьонум ойуурга тахсан дьэдьэннээбит саҕа сананаллар. Оттон тэлгэһэттэн хомуйуу — бэрт дьарык.

Быйыл күн уһаан, дьэдьэним билигин да үүнэ турар.

Бытааннык да буоллар, кытаран, сыта-сымара дыргыйар. Онон биһиги, дьахталлар, Ийэ Айылҕаттан «Дьахтар сайынын өссө да уһата түс дуу…» диэн көрдөһөбүт.