Хамнаһы, босуобуйаны тэҥинэн ыла сылдьыбыт

Горнай улууһун полициятыгар Дьарыктаах буолуу киинин үлэһиттэрэ сайабылыанньа суруйбуттар. Үлэтэ суох диэн аатырбыт дьахтар сокуоннайа суохтук босуобуйа ыла сылдьар диэн үҥсүбүттэр. Түөкүннээһин быһыытынан, холуобунай дьыала тэрилиннэ.

34 саастаах дьахтар үлэтэ суох хаалан баран, Дьарыктаах буолуу киинигэр тиийбит, докумуоннарын биэрбит. Онон киниэхэ босуобуйа анаабыттар. «Үлэ буллаххына, тута биллэрэҕин», — диэн сэрэппиттэр.

Ол эрээри, сотору кэминэн дьахтар кафеҕа үлэ булан киирбит, хамнас ыла сылдьыбыт уонна Дьарыктаах буолуу киинигэр соруйан биллэрбэтэх. Онон босуобуйаны тэҥинэн ыла сылдьыбыт. Хоромньу суумата 60 тыһыынча солкуобайга тиийбит. Бу туһунан ИДьМ пресс-сулууспата иһитиннэрэр.

Түөкүннээһин быһыытынан холуобунай дьыала тэрилиннэ. Бу дьахтар РФ Холуобунай кодексын 159.2 ыстатыйатынан («Мошенничество при получении выплат») сууттаныахтаах. Онон судаарыстыбаны албынныы сатыыр туһата суох.