Хампатааҕы «Эрэл» норуот айымньытын киинэ түмсүүлэринэн баай (ВИДЕО)

Бу күннэргэ Бүлүү улууһун Хампатыгар аныгылыы тутуулаах Норуот айымньытын дьиэтэ үлэҕэ киирдэ. 

Култуура саҥа дьиэтэ аһыллыан иннинэ Хампаҕа эрдэ кэлбит буолан, үлэҕэ киириэн иннинэ билсэргэ санаммытым. Саҥа дьиэҕэ киирбитим, үлэһиттэр түбүк бөҕө буола сылдьаллар эбит. Дириэктэр Александра Семенованы ыйыталаспыппар, «Иккис этээскэ баар», — диэтилэр. Үөһэ тахсан салайааччы түбүгүрэ сылдьарыгар түбэстим.

Олус бэрт сонун сүүрээни — Оҕо хоһун көрдөрөн баран,  Александра Степановна  саҥа тутууну көрдөрүөн иннинэ саҥа дьиэ туһунан бу курдук билиһиннэрдэ:

Салгыы Норуот айымньытын киинин дириэктэрэ атын хосторго сирдээтэ.

Киэргэнэр хоһу көрөн баран, аны киэҥ-куоҥ фойеҕа киирэбит. Манна быыстапкаҕа бэлэмнэнэ сылдьаллар.

Салгыы Норуот айымньытын киинигэр туох өҥөнү оҥороору сылдьалларын билистибит.

Норуот айымньытын киинигэр 18 түмсүү мустан айар талааннарын сайыннаран салгыы үлэлиэхтэрэ, өрөспүүбүлүкэҕэ эрэ буолбакка, дойду киин куораттарыгар тиийэ төрөөбүт Хампаларын аатын сураҕырдыахтара.

Култуура киинин саамай «хорук тымыра» — 120 миэстэлээх көрөр саала. Киһи сөҕө көрөр көстүүтэ!

Бу курдук, Норуот айымньытын киинин кытта билсэн баран, сарсыныгар мааны уораҕайы үөрүүлээхтик аһыы сиэрэ-туома, кыһыл лиэнтэни быһыы буолла.

СӨ Култуураҕа уонна духуобунаска сайдыытын миниистирин 1-кы солбуйааччы Афанасий Ноев эҕэрдэ тылын маннык саҕалаата:

Афанасий Иванович салгыы «Улууска култуураҕа улахан болҕомто ууруллар» диэн эттэ:

Олус истиҥ эҕэрдэ тылларын этэн туран, култуура миниистирин 1-кы солбуйааччы Афанасий Ноев министиэристибэ аатыттан «Эрэл» Норуот айымньытын киинэ материальнай баазатын хаҥатыыга анаан дьоһун бэлэҕин туттарда.

Улуус баһылыга Сергей Винокуров бэйэтин эҕэрдэ тылыгар Хампа нэһилиэгэ култуура эйгэтигэр баай устуоруйалааҕын, олус улахан оруоллааҕын ыйан туран, нэһилиэк талааннаах дьоно эдэриттэн эмэнигэр тиийэ Саха сирин дойду үрдүнэн аатырдалларын бэлиэтээтэ.

«Эрэл» норуот айымньытын киинэ аһыллыбытынан Ил Түмэн дьокутаата Ньургуйаана Захарова, улуус нэһилиэктэрин баһылыктара, Бүлүү улууһун уопсастыбаннаһа эҕэрдэлэрин тиэрдэн туран, бэлэх арааһын туттардылар.

Бүлүү улууһугар култуура эйгэтигэр улахан болҕомто уурулларын туоһута — Хампатааҕы норуот айымньытын дьиэтэ  араас уотунан тырымнаан, дьону сырдыкка-кэрэҕэ угуйа турара…