««Hamster Kombat» оонньууга түөкүттэргэ түбэһиэххит»
![](https://sakha-sire.ru/wp-content/uploads/2024/07/shutterstock_2468348265-pic_32ratio_900x600-900x600-35461-900x596.jpg)
Телеграм социальнай ситимигэр эдэр ыччат ортотугар аатырбыт «Hamster Kombaт» оонньууну туһанааччылар түөкүттэргэ түбэһэр кутталлаахтарын туһунан РТУ МИРЭА КБ-1 «Защита информации» кафедратын преподавателэ Василий Шутов «RT» интервьютун кэмигэр сэрэттэ.
«Билигин виртуальнай манньыаты дьиҥнээх харчыга атастаһыннарар олус элбэх бөлөх уонна боттар бааллар. Ол эрээри, итинник этиилэр барыта албын буолаллар», — диэн эспиэр иһитиннэрдэ. Кини этэринэн, түөкүттэр кэлин виртуальнай харчыны дьиҥнээх харчыга уларытар сыалтан каарта нүөмэрин уонна СМС дааннайын көрдүөхтэрин сөп. Ону таһынан Василий Шутов түөкүттэр «Hamster Kombaт» оонньууга сигэнэн, бэйэлэрэ оҥорбут боттарынан хас биирдии киһи тус дааннайын хомуйан ылалларын сабаҕалыыр. Исписэлиис тус дааннайдары биэрэр ханнык баҕарар ыйытыыга сэрэхтээхтик сыһыаннаһарга ыҥырар.
«Hamster Kombaт» — бу билигин Арассыыйа үрдүнэн телеграм социальнай ситимигэр саамай элбэх кыттааччылаах аатырбыт оонньуу буолар. Манна хас биирдии киһи «хомягы» устар күнү быһа баттаан, виртуальнай манньыаттары хомуйар. Оонньууну оҥорооччулар сотору кэминэн виртуальнай манньыаттары дьиҥнээх харчыга эбэтэр криптовалютаҕа уларытыахха сөп буолуоҕа диэн эрэннэрэллэр.
Сообщить об опечатке
Текст, который будет отправлен нашим редакторам: