Хаартыска Мария Васильева түһэриитэ (СИА)
Бүгүн, олунньу 3 күнүгэр, сылын аайы ыытыллар үтүө үгэскэ кубулуйбут «Хаҥалас хапсаҕайа» күрэхтэһиини аһыы үөрүүлээх быһыыга-майгыга буолла. Быйыл күрэхтэһии, ол эбэтэр 27-с турнир олунну 3-4 күннэригэр «Триумф» спортивнай уораҕайга ыытыллар.
Санатар буоллахха, улахан түһүлгэҕэ Саха сириттэн, Монголияттан, Кыргызстантан, Узбекистантан, Бурятияттан, Тываттан, Алтайтан, Татарастантан, Чувашияттан уонна Хакасияттан барыта 400-тэн тахса бөҕөс илин-кэлин былдьаһыа.
«Национальнай спорт көрүҥнэрэ, төһө кыалларынан, олимпийскай таһымҥа тиийэллэрин туһугар кыһаллыахтаахпыт. Саамай сүрүнэ, национальнай күрэхтэһиилэри Арассыыйа үрдүнэн үчүгэйдик билиэхтээхпит уонна бары маассабайдык дьарыктаныахтаахпыт», – диэн маннык хабааннаах турнирдар туох суолталаахтарын РФ Бэрэсидьиэнэ Владимир Путин сөрү-сөпкө эппит.
Күрэхтэһии кыттыылаахтарын СӨ спорка миниистирэ Леонид Спиридонов, Ил Түмэн бэрэссэдээтэлин солбуйааччы Афанасий Владимиров уонна Хаҥалас улууһун баһылыга Олег Иринеев эҕэрдэлээтилэр.
Турнир бочуоттаах ыалдьытынан Арассыыйатааҕы бойобуой искусство сойууһун толоруулаах дириэктэрэ, каратэ федерациятын бэрэсидьиэнэ Рамиль Габбасов күрэхтэһээччилэри уонна көрөөччүлэри: «Бойобуой искусство сойууһун уонна кыттааччылар ааттарыттан барыгытын бу хапсаҕай национальнай тустуу бырааһынньыгынан эҕэрдэлиибин уонна сүгүрүйэбин», — диэн эттэ.
Чөмпүйэнээт кыайыылаахтара 300-түү тыһ. солк, ону тэҥэ, тустаах курунан уонна батыйанан, бирилийээннээх мэтээлинэн наҕараадаланыахтара. Бириис уопсай пуондата 3000000 солк. тэҥнэһэр.
Бу иннинэ Дьокуускайга тэрийээччилэри кытта кыттыылаах пресс-кэмпириэнсийэ буолбута. Онно Кыргызстан курош федерациятын бэрэсидьиэнэ Рыскельди Шамиев Кыргызстан хамаандата олус күүстээх бөҕөстөрү аҕалбытын туһунан иһитиннэрдэ. Дэлэгээссийэ Дьокуускайга тохсунньу 30 күнүгэр кэлбит. «Хапсаҕайы биһиги олус сөбүлээтибит. Ол иһин дойдубутугар бу көрүҥү сайыннарыахпыт. Бу көрүҥ инникилээх диэн көрөбүт», – диэн кини санаатын үллэһиннэ.
«Хапсаҕайы саҥалыы дьүһүннээн-бодолоон көрүөхпүт. Тустууга араас истииллээх бөҕөстөр саха хапсаҕайын быраабылатынан киирсиэхтэрэ. Аан дойду таһымнаах бөҕөстөр кэллилэр, ол эрээри, биһиги хапсаҕайдьыттарбыт сөптөөх утарсыыны оҥоруохтара» – диэн быһаарда СӨ хапсаҕай федерациятын вице-президенэ Вячеслав Нестеров. Кини эппитинэн, быйыл атырдьах ыйыгар Кыргызстааҥҥа хапсаҕайга улахан турнир ыытыллара былааннаныллар, онно 35 дойду бөҕөстөрө кыттыахтара. Вячеслав Нестеров мас тардыһыы курдук хапсаҕай аан дойду билиниитин ыларыгар эрэнэрин туһунан эттэ.
Ааспыт сууккаҕа Саха сиригэр буруйу оҥоруу сэттэ түбэлтэтэ тахсыбыт. Манан процессуальнай бэрэбиэркэни ыытыыны уонна холуобунай…
«Якутскэнерго» ПАУо өрөспүүбүлүкэ олоҕо-дьаһаҕа бигэ туруктаах буолуутугар уотунан-сылааһынан хааччыйар дьоһун суолталаах тэрилтэнэн буолар. Хампаанньа генеральнай…
Бүгүн, тохсунньу 11 күнүгэр, өрөспүүбүлүкэ соҕуруулуу-арҕаа, хотугулуу-илин, илин өттүгэр кыралаан хаардыаҕа. Киин, арҕаа оройуоннарга туманнаах…
Бүгүҥҥү күн – наҕыл, сымнаҕас уонна дьиэҕэ-уокка чугас дьону кытта сынньанарга табыгастаах кэм. Ый Оҕус…
Бүгүн, тохсунньу 10 күнүгэр, биллиилээх суруналыыс, уопсастыбаннай диэйэтэл, РФ суруналыыстарын сойууһун, РФ уонна СӨ суруйааччыларын…
Саха сирин олохтоохторун төлөпүөнүнэн түөкүннээһин саҥа, кутталлаах көрүҥэ тарҕаммытын туһунан сэрэттилэр. Түөкүттэр военкомат аатыттан эрийэн,…