Хаҥалас «кыһыл көмүс ыалларын» чиэстээтилэр

Хаҥалас улууһугар бииргэ олорбуттарын 50 сылын бэлиэтээбит икки ыалы – Галибаровтары уонна Адамовтары чиэстээтилэр. Бу «кыһыл көмүс ыаллар» дьиэ кэргэн быстыспат ситимин, бэриниилээх буолууну уонна тапталы чаҕылхай холобурунан буолаллар, олохторун суолунан эдэр көлүөнэни кынаттыыллар.

Мерзия Валиахметовна уонна Гумар Вениаминович Галибаровтар 1975 сыл алтынньы 10 күнүгэр ыал буолбуттара. Тула уобалаһыттан төрүттээх Мерзия Валиахметовна дьолун уонна аналын Саха сиригэр булбута. Кини – физическай култуура үтүөлээх учуутала, «Успуорт бэтэрээнэ» бэлиэнэн наҕараадаламмыта, Саха Өрөспүүбүлүкэтин үөрэҕириитин туйгуна уонна Покровскай куорат бочуоттаах олохтооҕо. Гумар Вениаминович олоҕун успуорка анаабыта, Хаҥалас ыччат спортивнай оскуолатыгар чэпчэки атлетикаҕа тириэньэринэн үлэлээбитэ. Саха Өрөспүүбүлүкэтин үөрэҕириитин систиэмэтин бочуоттаах бэтэрээнэ, Хаҥалас улууһун бочуоттаах олохтооҕо уонна РСФСР норуотун үөрэҕириитин туйгуна. Кинилэр түөрт оҕону иитэн таһаарбыттар, бүгүн аҕыс сиэннэринэн көрөллөр.

Ольга Николаевна уонна Валерий Петрович Адамовтар 1975 сыл сэтинньи 26 күнүгэр олохторун холбообуттара. Ольга Николаевна – 42 сыллаах ыстаастаах педагог, Саха Өрөспүүбүлүкэтин үөрэҕириитин туйгуна, өрөспүүбүлүкэ үөрэҕириитин систиэмэтин бочуоттаах бэтэрээнэ, «Покровскай к. сайдыытыгар киллэрбит кылаатын иһин» мэтээлинэн наҕараадаламмыта. Валерий Петрович – физическай култуура биллиилээх учуутала, Покровскай 2-с №-дээх орто оскуолатыгар, Күөрдээххэ  ыччат спортивнай оскуолатыгар үлэлээбитэ, Хаҥалас холбоһуктаах ыччат спортивнай оскуолатын дириэктэрин солбуйааччытынан, Хаҥалас ыччат спортивнай оскуолатыгар буулдьанан ытыыга тириэньэринэн, оттон билигин – «Успуорт дыбарыаһа» МТ успуорка инструкторынан үлэлиир. Кини педагогическай ыстааһа 53 сыл.  РФ уопсай үөрэхтээһинин бочуоттаах үлэһитэ, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин «Учууталлар учууталлара». Адамовтар үс оҕолоохтор уонна икки сиэннээхтэр.

Хаҥалас улууһун баһылыгын социальнай боппуруостарга солбуйааччыта Николай Степанов маннык ыаллар уопсастыбаҕа суолталарын бэлиэтээтэ. «Бүгүн биһиги үйэ аҥара бииргэ олорбут ыаллары эрэ буолбакка, биһиги уопсастыбабыт дьиҥнээх холобурдарын чиэстиибит. Галибаровтар уонна Адамовтар ыаллара – бэйэни харыстаммакка таптааһын, үлэһит буолуу, бэйэ дьыалатыгар уонна кыра дойдуга бэриниилээх буолуу холобурдара буолаллар. Эһиги үтүө-мааны оҕолору иитэн таһаардыгыт, улууспут үөрэҕириитин уонна успуордун сайдыытыгар сыаната биллибэт кылааккытын киллэрдигит. Эһиги олоххут – биһиги харыстыахтаах уонна көлүөнэттэн көлүөнэҕэ тиэрдиэхтээх ыал сыаннастарыгар олоҕунан суруллубут үөрэх кинигэтэ. Хаҥалас улууһун дьаһалтатын уонна бары олохтоохторун ааттарыттан эһиэхэ дириҥ махталбын тиэрдэбин уонна кытаанах доруобуйаны, этэҥҥэ буолууну уонна өссө да уһун-дьоллоох олоҕу баҕарабын», — диэн баһылык солбуйааччыта эҕэрдэлээтэ. Бу туһунан «Хаҥалас улууһа» МТ пресс-сулууспата суруйар.