Хаҥалас лесничэйдэрэ байыаннай дьайыы буойунун ийэтигэр олбуорун туталлар

Бэҕэһээ-бүгүн Хаҥалас улууһун Хоточчутугар оройуоннааҕы лесничество кэлэктиибэ Егоровтар тиэргэннэрин олбуорун саҥардаллар. 10-тан тахса киһи хара сарсыардаттан сүүс баҕананы эргиттилэр, сиэрдийэлэрин саайыыга киирдилэр.

Виктор Егоров байыаннай дьайыыга 2022 сыллаахха балаҕан ыйын 23 күнүгэр барбыта. Бэбиэскэ тутарыгар Хаҥаластааҕы лесничествоҕа ойуур маастарынан үлэлиирэ.

“Виктор ийэтэ Лидия Петровна манна Хоточчуга олорор, кини тиэргэнин олбуора алдьанан турарын оҥорторуон баҕарарын, маска наадыйарын эппитэ. Салалтабыт өйөөбүтэ”, — диэн эттэ Хаҥалас улууһун лесничествотын салайааччытын солбуйааччыта Петр Герасимов.

Эргэни көтүрэн, барытын саҥардар үлэ бара турар.

“Тэрилтэбитигэр барыта 28 киһи үлэлиир. Байыаннай дьайыыга биһиги тэрилтэбититтэн Виктор Иванович сылдьар. Бииктэрбит төрөөбүт дьиэтин олбуордааһыҥҥа көмөлөһө кэлэ сылдьабыт”, — диэн учаастактааҕы лесничэй, профсойуус бэрэссэдээтэлэ Валерий Заморщиков кэпсээтэ.

Полина Николаева