Хаҥалас олохтооҕо бастыҥ от охсооччута буолла

Мэҥэ Хаҥалас улууһун Чүүйэ сэлиэнньэтигэр «Хотуур Хоһууннара» диэн от охсууга өрөспүүбүлүкэтээҕи күрэхтэһии буолан ааста.

Тэрээһиҥҥэ Саха сирин биэс оройуонун бэрэстэбиитэллэрэ кытыннылар. Күрэхтэһии түмүгүнэн кыайыылааҕынан Хаҥалас улууһуттан Кузьма Острелин бастыҥ от охсооччута буолла. Бу туһунан оройуон дьаһалтатын пресс-сулууспата суруйар.

Кузьма Острелин Нөмүгү нэһилиэгэ Аҕалар сүбэтин бэрэссэдээтэлэ буолар. Күрэхтэһиигэ кини 2016 сылтан кыттар, ол эрээри аан бастакытын  бастакы миэстэҕэ тиксибит. Бу иннинэ кини алтыс төгүлүн боруонса призера уонна икки төгүл боруонса мэтээл хаһаайынынан буолбута. Кини кыайыытын аҕатыгар – Кузьма Николаевич Острелиҥҥа анаата. Кини аҕата 81 сааһыгар диэри турунан туран окко тахсар эбит. «Хаҥалас улууһуттан түөрт киһи буолан кытынныбыт – мин, Нөмүгүттэн Иннокентий Тобонов, Мохсоҕоллоох бөһүөлэгиттэн Герман Готовцев уонна Уулаах Аантан Анастасия Соломонова. Күрэхтэһии үрдүк таһымҥа ыытылынна, биһигини олус үчүгэйдик көрүстүлэр, судьуйабыт да сөптөөх уонна компетентнай буолла. Мин бастакы миэстэни ыллым, Иннокентий уонна Герман үрүҥ көмүс призердарынан буоллулар, Анастасия бэһис миэстэҕэ тигистэ», — диэн кэпсээтэ кыайыылаах. Кини этэринэн, илиинэн оту охсуу  тиэхиньикэ үлэтин  кытта тэҥнээтэххэ, быдан хаачыстыбалаах. «Биһиги, атын да оройуоннарбыт курдук, бу былыргы төрүт үгэспитин умнуо суохтаахпыт уонна илиинэн от охсуохтаахпыт», — диэн Кузьма Острелин бэлиэтээтэ.

Илиинэн от охсор төрүт дьарыкпыт, төрүт хамсаныыбыт утума быстыбатын, ситимэ ситэриллэн истин.