Хаҥалас олохтооҕо кубаны өлөр өлүүттэн быыһаата

Үтүө санаалаах Хаҥалас улууһун Күөрдэм сэлиэнньэтин олохтооҕо Сергей Далбараев соҕотох хаалбыт  кубаны өлөр өлүүттэн быыһаата.

Алтынньы 24 күнүгэр Сергей арыыга сылдьан, соҕотох хаалбыт, мөлтөөбүт-ахсаабыт кубаҕа түбэспит. Кэрэ көтөр кыыдааннаах кыһын иннинэ үөрүттэн хаалан, ыттарга тутуллар кутталыгар киирэн, бүтэһик күүһүнэн көмүскэнэ сырыттаҕына, Сергей  күүстээх  быһаарыы ылынан, илиитинэн тутан ылбыт. Дьиэтигэр аҕалан, бүөбэйдээн, сылаас сиргэ хоннорон, кылгас кэм иһигэр бэттэх аҕалбыт.

Салгыы амарах сүрэхтээх киһи куба инники дьылҕатын быһаараары, улуус тустаах тэрилтэлэригэр төлөпүөнүнэн тахса сатаабыт. Ол эрээри, соһуйуох иһин, үгүстэр бу кыһалҕаны сэҥээрбэтэхтэр, «таһааран ытан кэбис, өлөр буоллаҕына өлөр буоллаҕа» диэн сүбэлээбиттэр. Ол да буоллар, Сергей Далбараев кэрэ көтөрү тыыннаах хаалларар санааламмыт.

«Сэдэх көтөрү быыһыыр баҕаттан, норуот дьокутаатыгар Тихон Скрябиҥҥа эрийэн, балаһыанньаны кэпсээбит. Тихон Николаевич бу туһунан истээт, тутатына Айылҕа харыстабылын министиэристибэтин кытта сибээстэспит. Түмүгэр, түргэн быһаарыы ылыллан, алтынньы 27 күнүгэр Майаттан экология үлэһиттэрэ массыынанан тиийэн, кубаны «Орто дойду» зоопаркатыгар илдьэ барарга быһаардылар. Ити курдук, өлөр өлүү суолугар киирэ сыспыт куба, амарах сүрэхтээх, эппиэтинэстээх Сергейгэ түбэһэн, инники олоҕо салҕанар буолла. Киһи сылаас сыһыана, кыһамньыта биир олоҕу быыһаабытыттан бары да үөрдүбүт. Этэҥҥэ буол кубачаан!», — диэн ааҕааччыларбыт суруйаллар.