Хаҥалас отчута Кузьма Острелин Чүүйэ алааһыгар иккис сылын тэҥнээҕин булбата

Бу күннэргэ Мэҥэ Хаҥалас улууһун Ходоро нэһилиэгин Чүүйэ Эбэ алааһыгар «Ходуһа хоһууттара-2025» илии хотуурунан оту охсууга өрөспүүбүлүкэтээҕи аһаҕас күөн күрэс буолан ааста. 

Мэҥэ Хаҥалас улууһун салалтата бу тэрээһини сөргүппүтэ сүүрбэттэн тахса сыл буолла. Бирииһэ да эмиэ ботуччу.  Ол курдук, муҥутуур кыайыылаахтар  дойдуларыгар убаһа уонна торбос илдьэ бардылар.

Онтон атын бириистээх миэстэҕэ тиксибиттэр 10-20 киилэлээх дьааһыгынан ынах арыытын, ботуччу харчынан, сыаналаах бирииһинэн бэлиэтэннилэр.

Тэрээһиҥҥэ биэс улуустан 50-ча киһи кыттыыны ылла. Хаҥалас улууһун отчуттара сыл аайы кыттыыны ылаллар уонна бириистээх миэстэҕэ тиксэллэр. Бэйэтин сааһыгар быйыл эмиэ бастаабыт Кузьма Острелин төрөөбүт дойдутун Хаҥалас улууһун сыл аайы дорҕоонноохтук ааттатар.

Быйыл 1985-1966 сыллаах төрүөх эр дьоҥҥо (40 саастарыттан 59 саастарыгар диэри) кини тэҥнээҕин эмиэ булбата.

Дьон Кууһуманы көрөөрү олох аатын ааттаан кэлэллэр эбит. Ол курдук, биир киһи ходуһаҕа «Хаҥалас охсооччута Кузьма Острелин ханна баарый? Быйыл кинини анаан көрөөрү кэллим, былырыын киинэҕэ курдук охсон кууһурҕатар этэ. Кинини көрдөрбүн, төттөрү дьиэлиэм, ыксыы сылдьабын» диэн көрдүү сылдьара. Онон иккиэн көрдөөн, хоһуун отчуту булан кэпсэттибит. “Миэхэ хотуурбун сытыылаабыт  Василий Окоровка истиҥ махталбын тиэрдиэхпин баҕарабын. Кини баар буолан, бу кыайыы миэхэ кэллэ. Улуус баһылыгар Дмитрий Тихоновка, тыа хаһаайыстыбатын управлениетын салайааччыта Аркадий Лукиҥҥа, кылаабынай судьуйа Дмитрий Сидоровка, успуорт тэрээһиннэрин ыытар Виталий Пестряковка истиҥ махталбын тиэрдэбин. Бу дьон салайыытынан илии хотуурунан оту охсууга ыытыллар күөн күрэс сыл аайы  өссө сытыырхайан, таһыма үрдээн иһэр. Тыа сирин укулаатын түстүүр маннык тэрээһини дьон сөбүлүүр, атын улуустартан анаан кыахпытын холонон көрө кэлэбит”, — диэн махталын биллэрдэ Кузьма Острелин.

Уһун тыыннаах Хаҥалас отчута Кузьма Острелин Афанасий Элегяев салайааччылаах «Чүүйэ» МУП туруорбут 30 тыһыынча солкуобай уу харчы бирииһинэн наҕараадаланна. Ити курдук, үлэ дьоно «Ходуһа хоһууттара-2025» илии хотуурунан өрөспүүбүлүкэтээҕи аһаҕас күөн күрэскэ дьоһуннаахтык чиэстэннилэр.