Хаҥалас сүүрүгэ Вячеслав Громов Дьокуускайдааҕы полумарафоҥҥа кыайда

От ыйын 26 күнүгэр Дьокуускайга 2016 сылтан ыытыллар үгэс буолбут түүҥҥү «Drivee Дьокуускайдааҕы полумарафон» буолан ааста.

Кыттааччылар – идэтийбит спортсменнартан саҕалаан сөбүлээн дьарыктанааччыларга тиийэ 5 км, 10,5 км уонна 21,1 км дистанциялары сүүрдүлэр. Сүүрүү 23:00 чааска саҕаланна, оттон кыттааччылар «Туймаада» стадиоҥҥа фиништээтилэр. Салгын температурата 18 кыраадыс сылаас, сиигэ 94% этэ, диэн yakutia-daily.ru иһитиннэрэр.

Финиш кэнниттэн үгүстэр тыынарга ыараханын бэлиэтээтилэр, ол эрээри түмүктэр сүнньүнэн үрдүктэр. 5 км дистанцияҕа Влад Петров 21:04.28 түмүктээх кыайыыны ылла. Иккиһинэн Владислав Адасько (22:19.09), үсүһүнэн – Саргылаана Бюлтясова (22:41.20) кэллилэр. 10,5 км сүүрүүгэ бастакынан Василий Исаков (38:29.25) кэллэ, кини кэнниттэн – Алексей Кузько (39:53.61), үһүс миэстэҕэ Сергей Исаков (40:19.09) таҕыста. Аҥаар марафоҥҥа (21,1 км) Хаҥалас улууһуттан төрүттээх ааттаах-суоллаах сүүрүк Вячеслав Громов кыайда (1 чаас 14 мүнүүтэ 14,09 сөкүүндэ). Киниттэн Дмитрий Ловцов 26 сөкүүндэнэн хаалла. Боруонса мэтээл Василий Готовцевка (1:17:16,52) тигистэ.

Кыттааччылар дистанцияларын от ыйын 27 күнүгэр түмүктээтилэр. Оттон күнүс 500 миэтэрэҕэ оҕолор сүүрүүлэрэ ыытылынна. Громов соторутааҕыта бэтэрээннэргэ саҥа көһөн, «Манчаары оонньууларын» чөмпүйүөнэ аан бастаан буолбута. Бу иннинэ кини үстэ үрүҥ көмүс призерунан буолбута, оттон 1999 сыллаахха уолаттарга кыайбыта. Ытык Күөлгэ финиш кэнниттэн Громов билиммитэ: «»Эн миэстэҥ – мэлдьи иккис», – диэн үгүстэр күлэллэрэ. Мин, бэл, 2017 сыллааҕы оонньуулар иннилэринэ: «Иккис миэстэни көрбөккө эрэ биэрэн кэбиһиҥ», – диэн хаадьылыырым. Дьэ, бүтэһигэр, сааспар сөп түбэһэн бэтэрээннэргэ тахсан, 5000 миэтэрэҕэ кыһыл көмүһү ыллым».

«Түүннү сүүрүү үчүгэйдик ааста. Бастаан мин инники иһэрим, онтон Дима Ловцов тахсыбыта. Атырдьах ыйыгар 100 км сүүрүөм. Бу көрүҥҥэ успуорт маастарын нуорматын толоруохпун баҕарабын. Сүүс км аан бастаан стартка тахсыам – урут марафоннары эрэ сүүрэрим. Билигин «Манчаары оонньууларын» кэнниттэн кыратык сынньана сылдьабын. Сарсыҥҥыттан маастар нуорматын толорорго бэлэмнэниини саҕалыам», – диэн Вячеслав Громов эттэ.