Хаҥалас Төхтүрүгэр ыһыахха сүүһүнэн киһи муһунна

Сир-дойду күөҕүнэн симэнэ сууланан турар кэмигэр, өҥүрүк куйаас түһүүтэ, уйгулаах сайыммыт ыһыаҕар Хаҥалас улууһун Төхтүр нэһилиэгэр ыраахтан-чугастан сүүһүнэн киһи тоҕуоруһа түмүстэ.

Сайдам санаалаах Төхтүрбүт сирин дьоно сарсыарда эрдэттэн оҥостон, тэринэн Улуу Кыайыы 80 сылын үбүлүөйдээх ыһыаҕа  Саха Өрөспүүбүлүкэтин үтүөлээх артыыһа, норуот ырыаһыта, өрөспүүбүлүкэ олоҥхоһута, Олоҥхо тыйаатырын артыыһа Исаков Валентин Гаврильевич алгыһынан саҕаланна. АГАТУ студеннарын үҥкүүтүнэн, Ырыа Саарын мааны ырыалаах куолаһынан арыалланан түһүлгэҕэ мустубут дьону сүргэлэрин көтөхтө, кырдьаҕас аҕам саастаахтары үөрүүлэрин үрдэттэ.

Ити курдук сэргэх ыһыаҕы эрдэттэн торумнаан ытык дьоммутун түһүлгэҕэ түмэн, ыһыах маанылаах аһынан: эмис биэ этинэн, арыылаах алаадьынан, кыынньар минньигэс быырпаҕынан түһүлгэҕэ кэлбит бары дьону күндүлээн, кырдьык да быйаҥ ыһыаҕа бу буолла доҕоттоор.

Манна даҕатан эттэххэ, Улуу Кыайыы буолбут сылыгар колхуос олохтоохторугар уйгу быйаҥ ыһыаҕа ыһыллыбытын туһунан элбэх кинигэлэргэ ахтыылар бэчээккэ баалларын билэбит.
Нэһилиэк баһылыга Кэскил Ньургун уола эрдэттэн сыал-сорук туруоран быйылгы ыһыах үрдүк таһымҥа барыытын ирдээн, үбү-харчыны, спонсордары кытта үлэлэспитэ көстөр.
Кымыс иһиитигэр тыыл бэтэрээннэрин уонна сэрии кэмин оҕолорун бэйэтин биһирэм түһүлгэтигэр ыҥыран биһирэмнээтэ, хас биирдиилэригэр үтэһэлээх этинэн, быырпаҕынан,  хаанынан  күндүлээтэ.
Салгыы ыһыах түһүлгэлээх оонньуулара кыра саастаах оҕолортон саҕалаан, күүстэригэр-уохтарыгар сылдьар ыччат дьоммут күөн көрүстүлэр, илин-кэлин түһүстүлэр. Төһө да салгыммыт сөрүүн буоллар, көрөөччүлэр тарҕаспакка бүтэһиккэ диэри сахабыт ытыктаан оонньоон кэлбит оонньууларын сэргии көрдүлэр.

Ыччат дьон биэс түһүмэхтээх Өбүгэ оонньууларыгар сэттэ буолан сүрдээх сытыытык кииристилэр. Түмүккэ,  Кылаан чыпчаал аатын Юлиан Попов ылла. Манна көрүҥ аайы, үстүү миэстэҕэ анал бириистэр спонсордартан турда. Салгыы түөлбэ оонньуута күрэххэ биэс түөлбэ, алта түһүмэххэ кытыннылар.
Манна кирпииччэ үктээһинэ, үтүлүгү тигии, бурдугу сиидэлээһин,  тоһоҕону саайыы уо.д а. түһүмэхтэргэ  кыайыылаахтар быһаарылыннылар.  Сүрүн бирииһи — убаһаны Хаксыктан төрүттээх нэһилиэк Бочуоттаах олохтооҕо Шадрин П.С., иккис миэстэҕэ 20 тыһ. солк. «Хаксык» коллективнай хаһаайыстыба, үһүс миэстэҕэ урукку «Кыһыл сулус» холкуос олохтоохторун  сыдьааннара 17 тыһ. солк., төрдүс миэстэҕэ маалтаанылар ынах тириитин туруордулар. Маны таһынан олохтоох дьаһалта сертификаттары туттарда.
Ити курдук, уйгу быйаҥ ыһыах түһүлгэтиттэн дьон сэргэ үөрэн-көтөн астынан, махтанан тарҕастылар.
Ситэрэн эттэххэ, быйылгы тэрээһиннэргэ өрөгөйдөөх Кыайыыны сылайары, аччыктыыры билиммэккэ эттэринэн-хааннарынан уһансыбыт сэрии толоонугар геройдуу охтубут уонна эргиллэн кэлэн дьоллоох олоҕу тутуспут күндү дьоммут ааттарын ааттаан үйэтитэн, кинилэр сыдьааннара, оҕолоро, сиэннэрэ күүс-көмө, спонсор буоллулар.  Биирдиилээн предпринимателлэр эмиэ көмөлөстүлэр.

М.Ефремова, 
Бэтэрээннэр сэбиэттэрин салайааччыта