Хаҥалас Тумулугар отчуот кэмигэр экологическай оскуола бырайыага толкуйданна

Бүгүн Хаҥалас улууһугар Бырабыыталыстыба отчуота түмүктэнэр күнүгэр,  Тумул нэһилиэгэр  Арассыыйа наукаларын академияларын чилиэн-кэрэспэдьиэнэ, биологическай наука доктора, профессор Никита Гаврилович Соломонов нэһилиэстибэтин үйэтитэр боппуруоһу ырыттылар.

“Уопсастыбаннаһы кытта көрсүһүүгэ учууталларга олорор дьиэ, оскуоланы саҥардыы боппуруостарын кэпсэтэрбитигэр, Никита Гаврилович нэһилиэстибэтин үйэтитэр сыалтан экологическай оскуола бырайыагын олоххо киллэриини дьүүллэстибит.  Бу бырайыак биологияны уонна экологияны дириҥник үөрэтиигэ, оҕолор идэлэрин таба таларга быһаарыналларыгар көмөлөһүөҕэ. Манан сибээстээн, эдэр исписэлиистэргэ дьиэ тутуутун эмиэ быһаарыахха сөп», — диэн бырабыыталыстыба бэрэссэдээтэлин солбуйааччы Анатолий Семенов Тумул нэһилиэгин олохтоохторун кытта көрсүһүү кэнниттэн санаатын үллэһиннэ.

Маны таһынан, экологическай хайысхалаах дьоҕус оҕо лааҕырын тэрийии толкуйданна. Бу олохтоохтор эрэ көҕүлээһиннэрэ буолбакка, ыччат наукаҕа интэриэһин сайыннарар өрөспүүбүлүкэтээҕи таһымнаах бырайыак буоларын бырабыыталыстыба бэрэссэдээтэлин солбуйааччы бэлиэтээтэ.