Хаҥалас улууһугар гарааска эр киһи үгээрдээн тыына быстыбыт

Хаҥалас улууһугар гараастан 68 саастаах эр киһи өлүгүн булбуттар. Бу туһунан тохсунньу 30 күнүгэр сарсыарда дьуһуурунай борокуруор иһитиннэрдэ.

Биэдэмистибэ иһитиннэрэринэн, эр киһи «Тойота Пробокс» массыына үлэлии турар мотуоруттан үгээрдээн тыына быстыбыт.

Уопсайа, Саха сирин борокуратууратын дааннайынан, суукка иһигэр өрөспүүбүлүкэҕэ буруйу оҥоруу туһунан үс иһитиннэрии бэлиэтэммит.

Дьокуускайга уоруу уонна «Тойота Аллион» массыынаны күрэтии туһунан сайабылыанньа киирбит.

Мииринэй улууһун Алмазнай бөһүөлэгэр түөкүттэр, мэдиссиинэ өҥөтүн оҥоробут диэн албыыннаан, олохтоох киһиттэн 2,4 мөл. солкуобайтан тахса харчыны уорбуттар.

Суукка иһигэр түөрт итирик суоппар тутуллубут.