Хаҥалас улууһугар икки оҕо саанан ытыллан бааһырыыны ылбыттарынан полиция силиэстийэ ыытар

Атырдьах ыйын 13 күнүгэр киэһэ ИДьМ Хаҥаластааҕы отделын дьуһуурунай чааһыгар Кытыл-Дьураа нэһилиэгин биэлсэриттэн икки 14 саастаах оҕо саанан ытыллан бааһырбыттарын туһунан иһитиннэрии киирбит.  

Улаатан эрэр уолаттар атахтарын эчэтэн мэдиссиинэ көмөтүн көрдөөбүттэр. Хаҥалас улууһугар икки оҕо саанан ытыллан эт-хаан эчэйиитин ылбыттарын чахчытынан полиция силиэстийэ ыытар диэн ИДьМ пресс-сулууспата иһитиннэрэр.

Быһылаан тахсыбыт сиригэр полиция үлэһиттэрэ тута тиийбиттэр. Силиэстийэ кэмигэр биллибитинэн, 8 уонна 9 кылаастарга үөрэнэр үс оҕо чааһынай хараастан биир эмсэҕэлээбит оҕо аҕатын икки бултуур саатын булбуттар. Ханнык эрэ түгэҥҥэ 13 саастаах сокуоннай сааһын туола илик оҕо саанан ытан бииргэ сылдьыбыт оҕолорун дэҥнээбит.

Билигин бу эчэйбит оҕолорго мэдиссиинэ көмөтө оҥоһуллар, быраастар хонтуруолларыгар сылдьаллар. 20 уонна 12 калибрдаах булт саалара олохтоммут бэрээдэгинэн регистрацияламмыттар. Бэрэбиэркэ чэрчитинэн, саалар былдьаммыттар.