Хаҥалас улууһугар киһи өлүүлээх суол быһылаана таҕыста

Бүгүн сарсыарда 7:00 ч. саҕана 1997 с.т. суоппар Покровскай куорат Орджоникидзе уулуссатын 105 нүөмэрдээх дьиэтин аттыгар «Мицубиси Делика» мааркалаах массыынанан түргэнник айаннаан иһэн уруулун сатаан туппакка, суолтан төкүнүйдэ.

Бу туһунан СӨ Судаарыстыбаннай автоинспекциятын пресс-сулууспата иһитиннэрэр.

Суол быһылаанын түмүгэр массыынаҕа олорсон испит кыыс суһал көмө кэлиэн иннинэ миэстэтигэр тыына быһынна. Оттон суоппар Хаҥалас балыыһатын хирургия отделениятыгар киирдэ.

Суол-тырааныспар быһылаана тахсыбытынан Судаарыстыбаннай автоинспекция үлэһиттэрэ бэрэбиэркэ ыыталлар.