Хаҥалас улууһугар – «Ыраас нэһилиэк» аахсыйа

Быйыл атырдьах ыйыттан саҕалаан балаҕан ыйыгар диэри Экология, айылҕаны туһаныы уонна ойуур хаһаайыстыбатын миниистирэ Евгений Перфильев сорудаҕынан «Ыраас нэһилиэк» аахсыйа ыытылынна.

Бу күннэргэ Хаҥалас улууһугар «Ыраас нэһилиэк» аахсыйа чэрчитинэн ыраастыыр тэрээһиннэр ыытылыннылар диэн СӨ Экологияҕа, айылҕаны туһаныы уонна ойуур хаһаайыстыбатын министиэристибэтэ иһитиннэрэр.

Улуус муниципальнай тэриллиилэрин сириттэн-уотуттан 20 быраҕыллыбыт массыына араамата тиэйилиннэ. Хаҥаластааҕы судаарыстыбаннай экологическай кэтээн көрүү иниспиэксийэтиттэн, Мохсоҕолоох уонна Покровскай дьаһалталарыттан уопсайа 30 киһи ыраастааһын үлэтигэр кытынна. Икки манипулятор уонна түөрт самосвал массыына үлэлээтэ.

Тэрээһин сыалынан – айылҕаны ыраастааһын уонна сири-уоту тупсарыы буолар. Үлэ салҕанар. «Ыраас нэһилиэк!» аахсыйаҕа ким баҕарар кыттыан сөп. СӨ Экологияҕа, айылҕаны туһаныы уонна ойуур хаһаайыстыбатын министиэристибэтэ бары нэһилиэнньэлээх пууннары тупсарыы үлэтигэр кылааккытын киллэрэргитигэр ыҥырар.