Хаҥалас улууһун дэлэгээссийэтэ байыастарга гуманитарнай көмөнү тиэрдиэҕэ

Хаҥалас улууһун дэлэгээссийэтэ улуус баһылыга Сергей Гребнев салалтатынан байыаннай дьайыы буола турар сиригэр айаннаата. Дэлэгээссийэҕэ нэһилиэктэр баһылыктара Виктор Константинов, Роман Савин, Александр Алексеев уонна Кэскил Багдарыын бааллар. Бу туһунан улуус дьаһалтатын пресс-сулууспата иһитиннэрэр.

Кинилэр айаннарын сүрүн сыалынан байыастарга гуманитарнай көмөнү тиэрдии буолар. Тустаах тэриллэри атыылаһарга Хаҥалас улууһун социальнай-экэнэмиичэскэй сайдыытын пуондата хомуйбут үбэ-харчыта туттуллубут. Онон улуус көхтөөх олохтоохторун уонна кэлэктииптэрин көмөтүнэн пуонда счетугар 2 621 206 солк. киирбит. Байыастары сибээһинэн хааччыйар тэриллэри уонна дроннары атыыласпыттар.

Итиэннэ Хаҥалас улууһун олохтоохторо байыастары өйөөн, «Мы с вами!» диэн аһымал кэнсиэри ахсынньы 18 күнүгэр тэрийэн ыыппыттара. Ахсынньы бүтүүтэ 3,5 туонна гуманитарнай таһаҕас байыастарга ыытыллыбыт. Оттон бу тохсунньуга авиациянан 2 туонна 200 киилэ таһаҕас ыытыллыбыт.