Хаартыска СӨ уус-уран гимнастикатын федерациятын пресс-сулууспатыттан
Покровскайга Оҕо-ыччат успуордун оскуолата 1975 сыллаахха төрүттэммитэ. Оттон уус-уран гимнастика салаата манна 2021 сыллаахха арыллыбыта. Кэлэр сыл тохсунньутугар гимнасткалар бастакы кыра үбүлүөйдэрин – 5 сылларын бэлиэтиэхтэрэ. Бу Виктор Прокопьевич Громов, ол саҕана Оҕо-ыччат успуордун оскуолатын дириэктэринэн үлэлээбит уонна Хаҥалас улууһун үөрэҕин салаатын начальнига Елизавета Анатольевна Мартынова өйөбүллэринэн уонна күүстэринэн ситиһилиннэ. Бу туһунан СӨ уус-уран гимнастикатын федерациятын пресс-сулууспата иһитиннэрэр.
Гимнастика салаата аһыллыбыт бастакы күннэриттэн Саха Өрөспүүбүлүкэтин уус-уран гимнастикатын федерациятын бэрэсидьиэнэ Людмила Николаева өйөөбүтэ.
Билигин уус-уран гимнастика салаатыгар 140 оҕо дьарыктанар. Оҕо-ыччат успуордун оскуолата Покровскайтан ураты, өссө Ой уонна Мохсоҕоллоох сэлиэнньэлэригэр филиаллары аһан үлэлэтэр. Бу 5 сыл иһигэр оскуола эдэр гимнасткаларын ситиһиилэринэн киэн туттуон сөп, олор истэригэр 11 спортсменка 1 разрядтаах, 7 спортсменка успуорт маастарыгар хандьыдааттар бааллар. Хаҥалас Оҕо-ыччат успуордун оскуолатын үөрэнээччилэрин истэригэр өрөспүүбүлүкэ уус-уран гимнастикатын сүүмэрдэммит хамаандатын чилиэннэрэ, өрөспүүбүлүкэтээҕи уонна Бүтүн Арассыыйатааҕы турнирдар призердара уонна чөмпүйүөннэрэ бааллар. Салааны тириэньэр Тамара Еримеевна Борисова салайар – уус-уран гимнастика улахан энтузиаһа, 1 категориялаах тириэньэр-преподаватель, эбии үөрэхтээһин педагогтарын Бүтүн Арассыыйатааҕы «Сердце отдаю детям» куонкуруһун эрэгийиэннээҕи түһүмэҕин кыайыылааҕа. 2023 сылтан киниэхэ уус-уран гимнастикаҕа тириэньэр-преподаватель Динара Николаевна Кычкина көмөлөһөр.
Тамара Борисова, Хаҥаластааҕы Оҕо-ыччат успуордун оскуолатын салайааччыта, тириэньэр-преподавателэ:
-Биһиги гимнасткаларбыт ситиһиилэринэн киэн туттабыт. Кинилэр истэригэр Айлаана Очиржапованы, элбэх төгүллээх Бүтүн Арассыыйатааҕы күрэхтэһиилэр, өрөспүүбүлүкэ турнирдарын чөмпүйүөҥкэтин уонна призерун ааттыахпын баҕарабын, кини 2024 сыл түмүгүнэн «Хаҥалас улууһун сүүмэрдэммит хамаандатын бастыҥ спортсменнарын» уон бастыҥнарын иһигэр киирбитэ. Биһиги иитиллээччилэрбит успуорт чыпчаалларын дабайар эрэ буолбакка, научнай-практическай үлэнэн көхтөөхтүк дьарыктаналлар. Холобур, 2025 сыллаахха Снежана Толбоннохова уонна Таисия Громова «Наукаҕа старт» Бүтүн Арассыыйатааҕы научнай-практическай конференция кыайыылаахтара буолбуттара, Эльзана Мараказова «Кэлэр кэми түстээ» конференция лауреата буолбута. Биһиги иитиллээччилэрбит «ГТО» Бүтүн Арассыыйатааҕы хамсааһыҥҥа көхтөөхтүк кытталлар, бары нормативтары толорбуттара, 33 спортсменка ГТО үрүҥ көмүс значоктаах. Биһиги оскуолабытын, успуорт бу кэрэ көрүҥүн олус сөбүлүүбүт уонна биһиэхэ көмөлөһөр дьоммутугар махтанабыт!.
Хаҥаластааҕы оҕо-ыччат успуордун оскуолатын кэллэктиибин, бары иитиллээччилэрин уонна Хаҥалас улууһун олохтоохторун оскуола үбүлүөйүнэн эҕэрдэлиибит, чэчирии турууну, успуорка үгүс кыайыыны уонна ааспыт үйэҕэ эдэр спортсменнар элбэх көлүөнэлэрэ, кинилэр настаабынньыктара олохтообут албан ааттаах үгэстэрин салҕыылларыгар баҕарабыт!
Саҥа дьылга Соҕуруу федеральнай уонна Хотугу Кавказтааҕы уокуруктартан ураты Арассыыйа Европатааҕы чааһын үгүс сиригэр хаардыыр.…
Бу түбэлтэни Александр Аргунов аҕабыыт 1913 с. “Якутские Епархиальные Ведомости” сурунаал 17-с нүөмэригэр бэчээттэппит. 1908…
Тохсунньу 1 күнүттэн киин куоракка оптуобус төлөбүрэ 58 солкуобайга диэри үрдүүрүн туһунан киин куорат баһылыга…
1889 сыллаахха 1 Нөөрүктээйи нэһилиэгин бочуоттаах инородеһа, биллиилээх меценат Степан Идельгин үбүнэн Өлүөхүмэ улууһун 1…
Суут приставтарын федеральнай сулууспатын Дьокуускай куораттааҕы уонна Сунтаар улууһунааҕы управлениелара 280 тыһыынча солкуобайдаах иэһи төнүннэриигэ…
Дьоллоох Дьокуускай куораттан ахсынньы аан туманын хайа тыыран, ахсым-дохсун тимир көлөлөр мөҥүрүөннэр түөлбэлээн олорор Матта…