Хаҥаласка байыаннай дьайыы кыттыылаахтарыгар болҕомтону күүһүрдэллэр

Хаҥаласка сэтинньи 19 күнүгэр байыаннай дьайыы кыттыылаахтарын уонна кинилэр дьиэ кэргэттэрин кытта үлэҕэ биэдэмистибэлэр икки ардыларынааҕы хардарыта үлэлэһии боппуруостарын дьүүллэстилэр.

Улуус дьаһалтатыгар Психолог күнүн уонна Саха сирин психологтарын «25 сыл: уопут, сайдыы, үөскээһин. Уларыйыылар кэмнэрэ» VI пуорум чэрчитинэн төгүрүк остуол буолан ааста. Араас биэдэмистибэлэр исписэлиистэрэ нэһилиэнньэ психологическай доруобуйатын харыстааһын уонна байыаннай дьайыы кыттыылаахтарын, кинилэр дьиэ кэргэттэрин кытта үлэҕэ биэдэмистибэлэр икки ардыларынааҕы хардарыта үлэлэһии боппуруостарын ырыттылар, диэн Хаҥалас улууһун дьаһалтатын пресс-сулууспата иһитиннэрэр.

Портретнай саалаҕа социальнай блок, доруобуйа харыстабылын, үөрэхтээһин, култуура эйгэтин, байыаннай комиссариат, «Аҕа дойдуну көмүскээччилэр» судаарыстыбаннай пуонда уонна уопсастыбаннай тэрилтэлэр бэрэстэбиитэллэрэ муһуннулар. Тэрээһин Хаҥалас улууһун баһылыгын бастакы солбуйааччыта Егор Варламов салайыытынан ааста.

Көрсүһүү түмүгүнэн хас да сүрүн быһаарыы ылылынна. Олор истэригэр – нэһилиэктэргэ байыаннай дьайыы кыттыылаахтарын ортотугар уопсастыбаннай санаа лидердэрин быһаарыы, улууска байыаннай дьайыы бэтэрээннэрин Сэбиэтин уонна Аҕа дойду буойуннарын дьиэ кэргэттэрин кэмитиэтин филиалларын тэрийии, байыаннай дьайыы кыттыылаахтарын «Психология» хайысхатынан үөрэтиигэ көмөлөһүү. Итини таһынан байыаннай дьайыы тиэмэтигэр анаммыт тыйаатыр уонна муусукаҕа  туруоруулар сиэрийэлэрин ыытыы, байыаннай дьайыы кыттыылаахтарыгар уонна кинилэр дьиэ кэргэттэригэр көмө оҥоруу сомоҕо маршрутун оҥоруу, онон тэҥэ култуура, успуорт тэрилтэлэрин уонна уопсастыбаннай тэрилтэлэр кыттыыларынан бэтэрээннэри реабилитациялааһыҥҥа комплекснай сыһыаны киллэрии туһунан быһаарыы ылылынна.

Төгүрүк остуол бэрэссэдээтэлэ, Хаҥалас улууһун баһылыгын бастакы солбуйааччы Егор Варламов бары структуралар бииргэ үлэлииллэрин суолтатын бэлиэтээтэ. «Бүгүн биһиэхэ биир кэлим өйөбүл систиэмэтин тутуу олус суолталаах, онно биир да байыаннай дьайыы кыттыылааҕа, биир да дьиэ кэргэн болҕомтото суох хаалбат. Күүспүтүн түмэн биһиги көмүскээччилэрбитигэр сөптөөх көмөнү, арыаллааһыны уонна толору реабилитацияланалларыгар усулуобуйаны хааччыйар кыахтаахпыт», — диэн Егор Варламов бэлиэтээтэ. Төгүрүк остуол түмүк таһаарыытынан уонна түмүктүүр быһаарыылары бигэргэтиинэн түмүктэннэ.