Хаҥаласка бензопила уорбут 38 саастаах эр киһи тутулунна

ИДьМ сулууспатын Хаҥалас улууһунааҕы отделын дьуһуурунай чааһыгар олохтоох киһи 17 тыһ.солк. кэриҥэ сыаналаах бензопилата уоруллубутун туһунан сайабылыанньа суруйбут.

Саха сиринээҕи ИДьМ иһитиннэрэринэн, холуобунай ирдэбил үлэһиттэрэ суһал-ирдиир дьайыыларынан уорбаланааччыны быһаарбыттар – урут түөкүннээһиҥҥэ сууттаммыт 38 саастаах улуус олохтооҕо буолбут.

Барылаан быһаарыынан, хара санаалаах эр киһи эмсэҕэлээччигэ быстах кэмҥэ олорон, баанньык оҥорорго көмөлөспүт. Үлэтин бүтэрэн, төлөбүрүн ылбыт уонна Дьокуускайга барбыт. Онно хамнаһын барытын бараан баран, эмсэҕэлээччи дьиэтигэр төннөн кэлбит. Үлэлэппит киһитин гарааһыттан бензопиланы уорбут уонна 6 тыһыынча солкуобайга комиссионнай маҕаһыыҥҥа туттарбыт. Харчытын тус наадатыгар туһаммыт.

РФ Холуобунай кодексатын 158-с ыстатыйатын 2-с чааһынан («Уоруу») холуобунай дьыала көбүтүлүннэ. Бу ыстатыйанан эр киһи 5 сылга диэри көҥүлэ быһыллыан сөп. Дьыалаҕа эриллибит киһиэхэ ханна да барбат уонна сөптөөхтүк быһыыланар туһунан баппыыскаҕа илии баттааһыннаах миэрэ ылылынна.