Хаҥаласка дьиэни уоттааһыҥҥа уорбаланар киһини быһаардылар

Муус устар саҕаланыыта ИДьМ Хаҥаластааҕы отделыгар Улахан Аан олохтооҕо дьахтар чааһынай дьиэҕэ баһаар буолбутун туһунан иһитиннэрбит.

Баһаарынайдар уоту түргэнник умуруорбуттарын да үрдүнэн, хоромньу үгүс буолбут. Баһаарга ким да эчэйбэтэх, өлбөтөх.

Бэрэбиэркэ кэмигэр баһаар буолбут сириттэн бэнсиин тобохтоох 50 лиитэрэлээх кэниистирэни булбуттар. Дьиэ хаһаайына уоту умуруоруу кэмигэр түннүк алдьаммытын бэлиэтии көрбүтүн эппит. Ыаллыы турар дьиэҕэ иилиллэн турар камера устубутун көрбүттэрэ, биллибэт киһи дьиэни уоттаан баран куотара көстүбүт.

Суһал-ирдиир тэрээһиннэр кэннилэриттэн, 35 саастаах олохтоох киһи уорбаланарын быһаарбыттар. Холуобунай дьыала тэриллибит. Хоромньу биэс мөл.солк. тэҥнэспит.