Хаҥаласка эр киһи кыбартыыраттан тэлэбиисэр, ТВ-приставка уорбут

Хаҥалас улууһун ИДьМ отделын дьуһуурунай чааһыгар олохтоох дьахтар, бэйэтэ куортамҥа биэрэр дьиэтиттэн халадьыылынньык, тэлэбиисэр уонна ТВ-приставка уоруллубуттарын туһунан сайабылыанньа суруйбут. Уопсай хоромньу суумата 57 000 солк. таҕыста.

Холуобунай ирдэбил үлэһиттэрэ урут сууттаммыт 41 саастаах ыаллыы олорор эр киһи буоларын быһаардылар, диэн Саха сиринээҕи ИДьМ пресс-сулууспата иһитиннэрэр.

Быһаарыллыбытынан, дьахтар 4-с этээскэ баар дьиэтигэр 2-с этээстэн ыаллыы олорор дьүөгэтин ыалдьыттата ыҥырбыт. Дьахтар бэйэтин кытта 5-с этээскэ олорор уорбаланааччыны илдьэ кэлбит.

Итирдэр утахтаах остуол кэнниттэн дьон тарҕаспыттар. Ол эрээри ыалдьытымсах дьахтар киирэр аанын күлүүһүнэн хатыырын умнан кэбиспит, ону буруйу оҥорооччу туһаммыт. Уоруллубут баай-дуол былдьанна. РФ Холуобунай Кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Эр киһи биэс сылга диэри болдьоххо көҥүлэ быһыллыан сөп.