Хаҥаласка өттүгэ тостубут 86 саастаах дьахтарга сүһүөх уларытар бастакы эпэрээссийэни оҥордулар

Хаҥалас киин улуустааҕы балыыһатыгар өттүгүн уҥуоҕа  тостубут 86 саастаах дьахтарга аан бастаан өттүк сүһүөҕүн эндопротезтаатылар.

Суһал эпэрээссийэни 2 №-дээх Өрөспүүбүлүкэтээҕи балыыһа – ЦЭМП травматолог-быраастара оҥордулар. Маннык эпэрээссийэ кэмигэр быраастар өттүк сүһүөҕүн титаан протеһынан толору солбуйаллар.

«Эпэрээссийэ  үлэһиттэр чопчу түмсүүлээх үлэлэрин түмүгэр этэҥҥэ түмүктэннэ. Номнуо иккис сууккатыгар ыарыһахха бэйэтэ туран хаамарыгар сүбэлэннэ. Аны мантан инньэ маннык эпэрээссийэлэр балыыһаҕа наада буоларынан оҥоһуллуохтара. Бу өттүк уҥуоҕа сүһүөҕэ тостубут ыарыһахтарга оҥоһуллар мэдиссиинэ көмөтүн хаачыстыбатын үрдэтиэҕэ уонна өрөспүүбүлүкэтээҕи эмтиир тэрилтэлэргэ ноҕуруусканы аччатыаҕа», — диэн Хаҥалас киин улуустааҕы балыыһатын пресс-сулууспата иһитиннэрэр.