Хаҥаласка хотон суулунна

Быйыл хаар халыҥ буолан, куоракка уонна тыа сиригэр кутталы үөскэтэр. Ол туоһутунан бэҕэһээ, кулун тутар 26 күнүгэр, киэһэ 18.30 чааска Хаҥалас улууһун Чкалов сэлиэнньэтигэр баар уопсай хотон сууллан, ыксалы үөскэтэ сырытта.

Бу 1986 сыллааҕы эргэ хотоҥҥо “Тиит Арыы” ТХПК сүөһүлэрэ (180 төбө, онтон ынаҕа – 122) кыстаан тураллар.

“Саха сирэ” хаһыат эрэдээксийэтигэр улуустааҕы тыа хаһаайыстыбатын управлениетын начаалынньыга Андрей Леонидович Архипов иһитиннэрбитинэн, дьолго, хата, киһи даҕаны, сүөһү даҕаны эмсэҕэлээбэтэх. Улахан хотон буолан, сүөһүлэр атын өттүгэр турар буолан, быыһаммыттар.

Быстах өрөмүөн ыытыллыбыт. Балаһыанньа болҕомтоҕо ылыллар.

Онон сааскы ириэрии кэмигэр халыҥ хаартан сылтаан, барытыгар даҕаны сэрэхтээх буолбут.