Хаҥаласка киһини сынньыбыт полиция үлэһитин уураттылар

Социальнай ситимнэринэн полицейскай Покровскай куорат 51 саастаах олохтооҕун улаханнык сынньыбытын туһунан иһитиннэрии улахан аймалҕаны таһаарда. Саха сиринээҕи ИДьМ пресс-сулууспата иһитиннэрбитинэн, 25 саастаах полиция үлэһитэ тутуллубут уонна үлэтиттэн ууратыллыбыт.

«Силиэстийэлиир тэрээһиннэр кэмнэригэр Хаҥалас улууһугар  ИДьМ сулууспатын силиэстийэлиир-суһал бөлөҕө итирик туруктаах сылдьар дьон икки ардыгар этиһии тахсыбытын, онно уорбаланааччы эмсэҕэлээччини илиитинэн уонна атаҕынан сынньыбытын быһаарбыт. Полицейскайдар буруйдаах улуустааҕы полиция отделын үлэһитэ буоларын быһаарбыттар. Полиция үлэһитэ тутуллубут.

Бу чахчынан тэрилтэ иһинэн бэрэбиэркэ ыытыллыбыт, онно олоҕуран атырдьах ыйын 18 күнүгэр кини ИДьМ уорганнарыттан ууратыллыбыт», — диэн Саха сиринээҕи ИДьМ пресс-сулууспата иһитиннэрэр.

Силиэстийэ дааннайынан, буруйу оҥоруу эмсэҕэлээччи олорор аадырыһынан буолбут. Ол иннинэ кини уорбаланааччыны кытта билсибит, эр киһи итирик да буоллар массыынатынан дьиэтигэр илдьэргэ сөбүлэспит. Кэлин икки эр дьон ардыларыгар иирсээн тахсыбыт. Ол түмүгэр буруйдаах аҕам саастаах киһини илиитинэн уонна атаҕынан сынньыбыт, ол иһигэр сирэйгэ уонна төбөҕө охсуталаабыт. 51 саастаах эр киһи элбэх эчэйиини ылан, балыыһаҕа сытар. Билигин кини туруга ыарахан, ол эрээри бигэтик диэн сыаналанар.