Хаҥаласка курьерскай сулууспа тэриллэн үлэлиир

Ааспыт сылтан Хаҥалас улууһугар курьерскай сулууспа ситиһиилээхтик тэриллэн үлэлиир.

Үлэ тосхоло: оройуон олохтоохторо социальнай ситимҥэ биир бөлөххө түмсэн, киэһэ ахсын дьиэ ааныгар диэри тиэрдиигэ араас табаардары тиэрдиигэ сайаапка түһэрэллэр. Ол кэннэ сарсыҥҥы күнүгэр сакаастаммыт табаары, эми-тому, бородууктаны ыйыллыбыт аадырыска сулууспа үлэһиттэрэ  тиэрдэн биэрэллэр. Саҥа сулууспаны Гаврил Егоров салайар – уруккута таксист. Кини бириэмэ сырсыытын кэмин бэйэтинэн билэр буолар бу олус наадалаах сулууспаны тэрийбит.

«Бу өҥө, мин саныахпар, социальнай суолталаах. Сакаасчыттарбыт ортолоругар аҕам саастаахтар, тырааныспара суох дьон-сэргэ, дьиэҕэ олорор соҕотох ийэлэр бааллар, — диэн кэпсиир Гаврил Егоров. – Билигин таксистар мэлдьи баһыылканы ылбат буола сатыыллар, ону кытта киһиэхэ барытыгар ытыктабыллаахтык сыһыаннаспаттар. Холобур, эһиги ыксыыр, тиэтэйэр кэмҥитигэр таксис куорат түгэҕэр ким эрэ баһыылкатын ыла айанныырын, биллэн турар, сөбүлүө суоххут».

Гаврил Егоров 2023 сыллаахха СӨ Үлэҕэ уонна социальнай сайдыыга министиэристибэтин иһинэн Хаҥаластааҕы нэһилиэнньэ социальнай көмүскэлин управлениетыгар социальнай хантараак ыларыгар сайаапка туттарбыт. Бизнес-былаан суруйбут, ситиһиилээхтик көмүскээбит уонна бэйэтин дьыалатын сайыннарыыга 500 тыһыынча солкуобайы ылбыт.

«Маннык көмө саҥа урбаанньыттарга олус наадалаах. Социальнай хантараак көмөтүнэн ылбыт харчыбыт суотугар массыынаны уларыппыппыт, диспетчергэ смартфон атыыласпыппыт. Билигин курьерскай сулууспабыт кэлэктиибигэр үс киһи үлэлиир. Мин бэйэм, өссө биир курьер Дьокуускайга кыра баһыылкалары тиэрдиигэ сүүрэр уонна диспетчер. Дьон-сэргэ араастаан сакаастыыллар. Кыһыҥҥы өттүгэр сакаас киирэрэ элбиирин бэлиэтээтибит», — диэн курьерскай сулууспа салайааччыта бэлиэтиир.

Сыл иһигэр курьердар 1000-тан тахса сакааһы тиэрдибиттэр. «Саамай ураты сакаас баар этэ дуо?» диэн ыйытыыга Гаврил ыраах Москваттан  сакаас киирбитин туһунан санаата. «Сакаасчыттар аймахтарыгар сибэкки дьөрбөтүн Селекционнай микрооройуоҥҥа илдьэргэ көрдөспүттэрэ. Атыыласпыппыт, тиэрдибиппит уонна ис дууһабытыттан эҕэрдэлээбиппит. Маннык түгэннэргэ туһалааҕынан дьарыктанабыт диэн олус үөрэбит», — диир Гаврил. Олохтоохтор курьердары көхтөөхтүк өйүүллэр, биллэриилэри тарҕатарга көмөлөһөллөр, үөрэ-көтө сакаастыыллар. Бу барыта, Гаврил этэринэн, ордук таһаарыылаах үлэҕэ көҕүлүүр.

Гаврил Егоров Үөһээ Бүлүү улууһуттан төрүттээх, Эдьигээн улууһугар улааппыт уонна билигин Хаҥалас улууһугар олорор. Кэргэнэ Нюргуянаны кытта 5 оҕону ииппиттэр. Сотору кэминэн кыракый сиэннэрэ икки сааһын туолар. Улахан кыыстара кэргэн тахсан, оҕо төрөтөн, АГАТУ преподавателинэн үлэлиир. Улахан уоллара  айтишник идэтигэр ХИФУ-га үөрэнэр, үс кыра оҕолор Покровскай орто оскуолатыгар 2 №-дээх оскуолаҕа үөрэнэллэр. Бу туһунан Хаҥалас улууһун дьаһалтатын пресс-сулууспата суруйар.