Хаҥаласка муниципальнай сулууспалаахха сокуоннайа суох бириэмийэ анаабыттар

Хаҥалас оройуонугар муниципальнай сулууспалаах уурайарыгар сокуоннайа суох төлөбүрдэри анааһын чахчынан холуобунай дьыала тэрилиннэ.

Хаҥалас оройуон борокуратуурата дьаһалта үлэ биэрээччитин көрдөһүүтүнэн уурайбыт муниципальнай сулууспалаахха компенсация уонна бириэмийэ төлөбүрдэрин ыытыы сокуоннайын бэрэбиэркэлээтэ. Ол курдук, муниципальнай сулууспа уонна салайааччы икки ардыларыгар өйдөспөт түгэннэр тахсаннар, салайааччы эр киһи уурайарыгар сайыбылыанньа суруйарга этии көтөхпүт. Ону эр киһи бириэмийэ уонна компенсация төлөбүрдэрин көрдөөбүт.

Муниципалитет салайааччыта үлэһиттэн босхолоноору сокуоннайа суох бэрээдэгинэн бириэмийэ уонна 1 мөл. солк. тахса суумалаах компенсация төлөбүрдэрин анаабыт.
Борокуратуура бэрэбиэркэтин матырыйаалларынан холуобунай дьыала тэрилиннэ. Холуобунай дьыала силиэстийэтэ борокуратуура хонтуруолугар сылдьар.