Хаҥаласка наркоманы туттулар

Хаҥалас улууһугар наркоман тутулунна диэн ИДьМ пресс-сулууспата иһитиннэрэр.

Алтынньы 4 күнүгэр Мохсоҕоллоох бөһүөлэгин 5 олохтооҕуттан полицияҕа сайабылыанньа киирбит. Биир эр киһи кинилэргэ күүһүнэн өттөйбүт, кырбаталаабыт, мачете курдук сэбинэн куттаабыт.

Холуобунай ирдэбил үлэһиттэрэ 35 саастаах киһини туттулар. Бу киһи урут ороспуойдааһын, халааһын, дьону кырбааһын, о.д.а. буруйу оҥоруунан хаста да тутулла сылдьыбыт эбит. Маны тэҥэ, наркотиктары, психотропнай бэссэстибэлэри туһанан, наркотиктан эмтэнэртэн куотунан, полицияларга бас бэриммэккэ, охсуһан, эмиэ ыстатыйаламмыт.

Билигин Хаҥалас улууһун ИДьМ отдела Холуобунай кодекс 213 ыстатыйатын 2 чааһынан холуобунай дьыаланы көбүттэ.

Маны тэҥэ, кэргэннии дьон полицияҕа эмиэ үҥсүбүттэр. Кинилэр этэллэринэн, бу киһи быһаҕынан быраҕаттаан, куттаабыт, эр киһи кууркатын хайыппыт, төлөпүөнүн алдьаппыт. Бу буруйу оҥоруунан ХК 167 ыстатыйатынан холуобунай дьыала тэриллиэн сөп.

Атырдьах ыйыгар бу киһи ГАИ үлэһиттэригэр тутуллубут, массыынаны ыыта сылдьан, саахалы таһаара сыспыт. Бу түгэҥҥэ кини итирик, эбэтэр, наркотиктан туймаарбыт эбит. Суол быраабылатыгар барыта 13 кэһиини таһаарбыт.

Билигин Хаҥалас оройуоннааҕы суутун быһаарыытынан, бу киһини силиэстийэлиир изоляторга хаайбыттар.