Хаҥаласка омуктары сымыйанан учуокка туруортарбыт аҕам саастаах дьыалаҕа эрилиннэ

Хаҥалас улууһугар полиция үлэһиттэрэ чугас тас дойду үс гражданинын сымыйанан регистрациялааһын чахчытынан холуобунай дьыаланы тэрийдилэр.

ИДьМ Хаҥалас улууһун отделын участковай боломуочунайдара рейдэ кэмигэр омук гражданнарын сымыйанан регистрациялааһын чахчытын буллулар. Полицейскайдар быһаарбыттарынан, Покровскай куорат 51 саастаах олохтооҕо бэйэтин дьиэтигэр чугас тас дойду биир дойдутуттан сылдьар үс гражданины, дьиҥинэн онно олорбот эрээри, сымыйанан учуокка туруорбут. Бу чахчыга олоҕуран РФ Холуобунай кодексатын 322.2 ыстатыйатынан («РФ олорор дьиэҕэ омук гражданинын эбэтэр гражданствота суох киһини олорор сиринэн сымыйанан регистрациялааһын») холуобунай дьыала тэрилиннэ.

ИДьМ өрөспүүбүлүкэ олохтоохторугар санатарынан, омук гражданнарын сымыйанан учуокка туруоран, кинилэр холуобунай дьыалаҕа эриллэр быһыыны оҥороллорун таһынан, буруйу оҥорууга уорбаланааччылары эбэтэр көрдөбүлтэн саһан сылдьар куһаҕан санаалаахтары саһыарарга көмөлөһүөхтэрин сөп, диэн ИДьМ пресс-сулууспата иһитиннэрэр.