Хаҥаласка полиция урукку үлэһитэ сууттанан, алта сылга көҥүлэ быһынна

Хаҥалас улууһугар борокуратуура полиция урукку үлэһитигэр тэриллибит холуобунай дьыаланан судаарыстыбаннай буруйдааһыны өйөөтө. Бу киһи РФ ХК 264 ыст. 4 ч. «а», «б» пууннарынан сууттанна диэн СӨ Борокуратуурата иһитиннэрэр.

Суут быһаарбытынан, 2023 сыл ахсынньытыгар сууттанааччы итирик туруктаах сылдьан, түүн кулууптан «Nissan Teana» массыынатынан төннөн испит.

Покровскай куорат Орджоникидзе уулуссатынан айаннаан иһэн суол утары балаһатыгар тахсан, сатыы киһини түҥнэри көппүт уонна массыынатын анныгар 20-чэ м. соһо сылдьыбыт. Массыыната ханаабаҕа тиийэн түспүтүгэр биирдэ тохтообут.

Сууттанааччы буруйун билиммэтэх, хараҥа уонна туманнаах буолан суолга хааман испит киһини көрбөтөҕүн эппит.

Борокуруор көрүүтүн учуоттаан, дакаастабыл баар буолан уонна эспэртиисэ түмүктэрэ көрдөрбүттэринэн, суут эр киһини буруйдааҕынан аахпыт, алта сылга көҥүлүн быһарга, итиэннэ 2 сыл 6 ый тырааныспар ыыппатыгар уураахтаабыт.

Массыынатын судаарыстыба дохуотугар ылбыттар. Суут бириигэбэрэ сокуоннай күүһүгэр киирэ илик.