Хаҥаласка улахан баһаары умуруордулар

Бэс ыйын 7 күнүнээҕи туругунан, Хаҥалас улууһугар биир улахан баһаар умуруорулунна. 408 гаа иэннээх сиргэ 4-с №-дээх АСС баһаары умуруорууга 88 киһи, 12 тиэхиньикэ үлэлээтэ диэн  Биир кэлим диспетчерскэй сулууспа иһитиннэрэр.

Ойуур баһаара Хаҥалас уонна Мэҥэ Хаҥалас улуустарын икки ардыларыгар күөдьүйбүтэ. Тиит Эбэ бөһүөлэгиттэн 73 килэмиэтир, Мэҥэ Хаҥалас Даркылааҕыттан 9,6 килэмиэтирдээх сиргэ умайбыта. Ону күөйэн, кылгас кэм иһигэр күүскэ үлэлээн, умуруордулар.

Билигин Хаҥалас улууһугар баһаар суох. Бэс ыйын 4 күнүгэр улууска баһаары утары ураты эрэсиими биллэрбиттэрэ. Ойуурга тахсыы, кутааны, бөҕү уматыы бобуллубута.

Бу маны тутуспат буоллахха, РФ КоАп 8.32 ыстатыйатын 3 чааһынан, административнай ыстараап олохтонор: чааһынай дьоҥҥо — 40-50 тыһыынча солкуобай, дуоһунастаах дьоҥҥо — 60-90 тыһыынча солкуобай, юридическэй сирэйдэргэ — 600 тыһыынча солкуобай.