Хаҥалас улууһугар ууга түспүт эр киһи өлүгүн буллулар

Бүгүн, атырдьах ыйын 14 күнүгэр, СӨ Быыһыыр сулууспатын быыһааччылара уонна олохтоох дьон Өлүөнэ өрүскэ Хаҥалас улууһун Тиит-Арыы сэлиэнньэтин аттыгар ууга түспүт киһи өлүгүн буллулар диэн биэдэмистибэ пресс-сулууспата иһитиннэрэр.

Санатан суруйдахха, атырдьах ыйын 4 күнүгэр Тиит-Арыы сэлиэнньэтин утары өрүскэ хаһаайына суох оҥочо уста сылдьарын булбуттара. Быһаарыллыбытынан, 1989 с.т. эр киһи соҕотоҕун бу оҥочонон айаннаабыт уонна сүппүт. Кытылтан саппыкытын уонна үрүсээгин булбуттара.

Олохтоох дьон тута көрдөөн саҕалаабыттара. Ол күн водолазтар тиийбиттэрэ, онтон икки быыһааччы көмөҕө айаннаабыта. Хас күн аайы өрүс устун, кытылларынан, Еланка сэлиэнньэтин аттынан, Чкалов, Харыйалаах арылаарынан 20 киһи көрдөөбүттэрэ.

Бүгүн карьер утары баар арыы аттынан устан иһэн, дагдайан тахсыбыт өлүгү булбуттар, ИДьМ үлэһитигэр тиксэриэхтэрэ диэн бөлөх старшайа Дмитрий Корнилов иһитиннэрбит.