Хаҥаласка ситэ тутуллубатах успуорт былаһааккатын үлэтин тутан дьыалаҕа тардылыннылар

Хаҥалас улууһун борокуратууратын бэрэбиэркэтин түмүгэр, улуус дьаһалтата бэдэрээччиккэ успуорт былаһааккатын тутууга аспаал-бетон бүрүөһүнүн тэлгээһин уонна да атын толоруллубатах үлэлэри туппута уонна төлөөбүрүн ыыппыта быһаарылынна.

Бу туһунан СӨ Борокуратууратын пресс-сулууспата иһитиннэрэр. Ситэ толоруллубатах үлэ суумата 3,4 мөл. солк. тэҥнэстэ. Улуус борокуратуурата ыыппыт бэрэбиэркэтин матырыйаалларыгар олоҕуран, РФ Холуобунай Кодексатын 286-с ыстатыйатын 1-гы чааһынан (сокуоннай боломуочуйаны аһары туттуу) холуобунай дьыала көбүтүлүннэ.

Билиҥҥи туругунан холуобунай дьыаланан силиэстийэлиир тэрээһиннэр ыытыллаллар, дьыала силиэстийэлээһинэ улуус борокуратууратын хонтуруолугар турар.