Хадан нэһилиэгэр саҥа успуорт комплекса тутуллан үлэҕэ киирбит

Сунтаар оройуонун Хадан сэлиэнньэтигэр былырыын саҥа успуорт комплекса арыллан үлэлиир. Ону кытта кэнники сылларга саҥа ФАП, саахалланар туруктаах дьиэлэртэн көһөрүү бырагырааманан 4 кыбартыыралаах икки олорор дьиэ тутуллубут.

Бу туһунан олунньу 11 күнүгэр үлэ түмүктэрин СӨ Бырабыыталыстыбатын вице-премьера Георгий Степанов салайааччылаах бырабыыталыстыба отчуотугар бэлиэтээтилэр, диэн СӨ Ил Дарханын уонна Бырабыыталыстыбатын пресс-сулууспата суруйар.

Хадан нэһилиэгин олохтоохторун тыа хаһаайыстыбатын сайыннарыыта, эбии социальнай эбийиэктэри тутуу боппуруостара долгутар. Туойдаах нэһилиэгин олохтоохторо саҥа оскуола эбийиэгин тутуутун туруорустулар. Ону таһынан олохтоохтор гааһынан хааччыйыы, эдэр исписэлиистэри дьиэнэн-уотунан хааччыйыы, устудьуоннар истипиэндьийэлэрин үрдэтии туһунан кэккэ ыйытыктары биэрдилэр. Оробуочай бөлөх чилиэттэрэ киирбит ыйытыыларга сиһилии хоруйдары биэрдилэр.

Доруобуйа харыстабылын миниистири бастакы солбуйааччы Дмитрий Сергин салайааччылаах иккис оробуочай бөлөх бырабыыталыстыба отчуотун Толоон уонна Күүкэй нэһилиэктэринэн тиийэн ыыттылар.

Үп миниистирин э.т. Иван Алексеев салайааччылаах үһүс оробуочай бөлөх Хоро уонна Элгээйи нэһилиэктэрин олохтоохторун кытта көрүстүлэр. Отчуот кэмигэр олохтоохтор социальнай эбийиэктэри тутуу, доруобуйа харыстабылын сайыннарыы уонна тыа хаһаайыстыбатын сайыннарыыга көрүллэр өйөбүллэр туһунан туоһуластылар. Киирбит ыйытыыларга чопчу былааннары уонна олоххо киирэр болдьохторун ыйан туран сиһилии хоруйдар бэрилиннилэр.

Санаттахха, Сунтаар улууһугар Бырабыыталыстыба отчуота олунньу 11 күнүттэн саҕаламмыта. СӨ Бырабыыталыстыбатын вице-премьера Георгий Степанов оробуочай бөлөҕө үс бөлөххө арахсан, 26 нэһилиэккэ тиийэллэрэ былааннанар. Отчуот 4 хонук устата ыытыллыаҕа уонна олунньу 14 күнүгэр Сунтаар сэлиэнньэтигэр түмүктэниэ.