Хандьыдааттары туруоруу түһүмэҕэ түмүктэннэ

Аны күһүҥҥү быыбардар буолаллара оруобуна 60 күн хаалла. От ыйын 9 күнүгэр хандьыдааттартан докумуону тутуу күнэ түмүктэннэ.

Бу туһунан СӨ Быыбар киин хамыыһыйатын бэрэссэдээтэлэ Евгений Федоров иһитиннэрдэ. Кини кэпсээбитинэн сылыктаатахха, интэриэһинэй, күрэстэһиилээх быыбар буолаара турар.

Саха Өрөспүүбүлүкэтин Ил Дарханын быыбарыгар аҕыс бэлитиичэскэй баартыйа бэйэтин хандьыдаатын туруорда: «Биир ньыгыл Арассыыыйа» баартыйаттан – Айсен Николаев; Пенсионердар баартыйаларыттан – Владимир Тимофеев; Арассыыйа хомуньуустара баартыйаттан – Игорь Борисов; «Зеленые» баартыйаттан – Александр Вакарь; Гражданскай платформаттан – Юрий Пшенников, «Родина» баартыйаттан – Олег Маклашов, КПРФ-тан – Виктор Губарев, ЛДПР-н – Гаврил Парахин.

Итини таһынан аны күһүн Ил Түмэн уонна Дьокуускай куорат Дууматын, 9 улуус баһылыгын итиэннэ 21 оройуон сэбиэтин дьокутааттарын талыахпыт.

Саха сирин Киин быыбардыыр хамыыһыйата норуот дьокутааттарын быыбарыгар бэлитиичэскэй баартыйаларынан туруоруллубут 6 өрөспүүбүлүкэтээҕи испииһэги бигэргэттэ, онно 411 киһи киирбит.

Бу күннэргэ биир мандааттаах быыбардыыр уокурукка 9 быыбардыыр холбоһук 172 хандьыдааты туруоран уонна 9 хандьыдаат бэйэлэрин кандидатураларын туруоран уокуруктардааҕы быыбар хамыыһыйатыгар сөптөөх докумуоннары туттардылар. Онон Ил Түмэн дьокутааттарын быыбарыгар барыта 592 хандьыдаат турбута бэлиэтэннэ.

«Билиҥҥи кэмҥэ хандьыдааттары регистрациялааһын саҕаланна. Салгыы регистрацияламмыт хандьыдааттар агитация түһүмэҕэр киириэхтэрэ, ол эрээри  маассабай иһитиннэрэр сириэстибэлэр нөҥүө агитация атырдьах ыйын 12 күнүгэр саҕаланыа. Бэс ыйын 7 күнүттэн 2023-2028 сс. учаастактааҕы быыбардыыр хамыыһыйа саҥа састааба хомуллубута. Барыта 6373 киһи, 791 учаастактааҕы хамыыһыйаҕа үлэлиэ. Кинилэр састааптарыгар 10 бэлитииичэскэй баартыйа бэрэстэбиитэллэрэ бааллар: «Биир ньыгыл Арассыыйа», «КПРФ», «Сиэрдээх Арассыыйа – Кырдьык иһин», «ЛДПР», «Саҥа дьон», «Гражданскай Платформа», «Зеленайдар», «Партия Роста», «Родина», «Пенсионердар Арассыыйатааҕы баартыйалара», – диэн кэпсээтэ СӨ Быыбар киин хамыыһыйатын бэрэссэдээтэлэ Евгений Федоров.