Ханнык орто үөрэх ордук куонкурустаах эбитий?

Атырдьах ыйын 15 күнүнэн орто үөрэхтэргэ туттарсааччылартан докумуоннары ылан бүтэллэр. Аҕыйах хонугунан түмүк тахсыаҕа. Ханнык идэлэр, үөрэх тэрилтэлэрэ ордук куонкурустаах эбиттэрий?

“Урукку сылларга тэҥнээтэххэ, быйыл бүддьүөт миэстэтэ 310 ахсаанынан элбээтэ. Сүрүннээн 9-с кылаас кэнниттэн туттарсааччыларга миэстэ эбиллибитэ. Ол курдук, өрөспүүбүлүкэҕэ баар 42 орто үөрэх тэрилтэтигэр, быйыл бүддьүөттэн, уопсайа, 6712 миэстэ көрүллүбүтэ. Итинтэн 11-с кылаас кэнниттэн туттарсааччыларга – 2989, 9-с кылаас кэнниттэн — 3655 миэстэ.

Бүгүҥҥү күннээҕи туругунан барыта 23 тыһ. тахса сайабылыанньа киирдэ. Ордук элбэх сайабылыанньаны сиэстэрэ дьыалата, информационнай систиэмэ уонна бырагыраамалааһын, эмчит дьыалата, оскуола иннинээҕи үөрэхтээһин, массыынаны көрүүнү-истиини хааччыйыы, экэниэмикэ уонна буҕаалтыр учуота, үп, алын кылаас учуутала, эбии үөрэхтээһин педагога хайысхаларыгар биэрдилэр. Үп-экэниэмикэ кэллиэһигэр биир миэстэҕэ 16, Дьокуускайдааҕы педагогическай кэллиэскэ 9,5, Автодорожнай тиэхиньикумҥа 7,8, Сибээс уонна энэргиэтикэ кэллиэһигэр 9,2 киһи куонкурустаһар. Куорат орто үөрэхтэригэр куонкурус олус үрдүк буолла”, — диэн СӨ Билимҥэ, профессиональнай үөрэхтээһиҥҥэ уонна тус сыаллаах бэлэмнээһиҥҥэ судаарыстыбаннай бэлиитикэ департаменын салайааччыта Иннокентий Оконешников иһитиннэрдэ.

Мииринэйдээҕи тиэхэньиичэскэй кэллиэскэ, Алдан, Хандыга, Ленскэй, Ньурба, Нам, Өлүөхүмэ, Покровскай уонна хоту улуустарга баар орто үөрэх тэрилтэлэригэр бүгүҥҥүтэ бүддьүөт миэстэлэрэ баалларын, абитуриеннар сайабылыанньаларын биэриэхтэрин сөбүн этэр. “Куоракка кыайан киирбэтэх, бырамыысыланнас идэлэрин сэҥээрээччилэр Мииринэйгэ, Алдаҥҥа, Хаандыгаҕа, сыбаарсык, асчыт, авто мэхээнньик идэтигэр үөрэниэхтэрин баҕалаахтар Нам, Ньурба тиэхиньикумнарыгар, тыа хаһаайыстыбатынан дьарыктаныахтарын баҕалаахтар Өлүөхүмэҕэ үөрэниэхтэрин, АйТи идэни баһылыыр толкуйдаахтарга Покровскайдааҕы кэллиэскэ билиҥҥитэ эмиэ миэстэлэр бааллар”, — диэн салайааччы быһаарда.

Санатан эттэххэ, орто анал үөрэхтэргэ сайабылыанньалары атырдьах ыйын 15 күнүгэр диэри туталлар. Хаалбыт миэстэлэргэ кэллиэстэр бэйэлэрин  көрүүлэринэн, болдьоҕу сэтинньигэ диэри уһатан биэриэхтэрин сөп.